Улаанбаатар
Азийн физикийн XXV олимпиадаас Монголын баг 7 медаль хүртлээ
МОНГОЛЫН МЭДЭЭ | БОЛОВСРОЛ
Улаанбаатар, 2025 оны тавдугаар сарын 11 /МОНЦАМЭ/. Азийн физикийн XXV олимпиад Саудын Арабын хаант улсын Дахран хотод энэ сарын 4-12-нд болж байна.
Уг олимпиадад Азийн 30 орны 240 гаруй сурагч, 100 гаруй багш, дасгалжуулагч оролцлоо. Монголын багийн 8 сурагч оролцож 1 мөнгө, 6 хүрэл медаль, 1 шагналт байр хүртэж, Монгол Улс анхны мөнгөн медалиа авсан түүхэн амжилт гаргалаа.
МУИС-ийн багш доктор, дэд профессор
Г.Мөнхбаяр, ШУТИС-ийн багш доктор, дэд профессор Г.Зоригт нар багийн ахлагч багшаар, дасгалжуулагч багшаар УФО-ын хорооны дарга М.Ганбат, МУИС-ийн
багш М.Отгонбаатар нар ажиллажээ.
Шагнал гардуулах үйл ажиллагаа маргааш болно.
Өнгөрсөн жил Монгол Улс 2 хүрэл медаль, 2 шагналт байр эзэлж байсан. Ирэх жил "АФО2026" БНСУ-ын Бусан хотод болох аж.
