Хорват дүрвэгчдийг Унгарын хил рүү зөөж байна

Дэлхийд | Улс төр
dorjkhand@montsame.mn
2015-09-19 13:32:52

ЗАГРЕБ. /Xinhua/. Ойрхи Дорнод болон Африкаас очсон цагаачид, дүрвэгчдийг Зүүн Европын улсууд хүлээж авахаас татгалзаж, тэднийг бие бие рүүгээ түлхэж байна.

Энэ долоо хоногийн эхээр Унгар хилийн хяналтаа чангатгаж эхэлснээс хойш хэдэн мянган хүн Хорватад очжээ. Тэд Герман болон Европын бусад чинээлэг улсад очихыг хүсч байгаа билээ.

Өнгөрсөн лхагва гарагаас баасан гарагийн хооронд 15 мянга гаруй хүн Хорват руу нэвтэрсэн гэсэн мэдээлэл байна.

Хорватын Ерөнхий сайд Зоран Миланович өчигдөр сэтгүүлчдэд мэдэгдэл хийхдээ, “Манай улс дүрвэгчдийг нэмж хүлээж авах боломжгүй” гэжээ.
Тус улсын Засгийн газар дүрвэгчдийг автобус болон галт тэргээр Унгарын хил рүү одоо зөөж байгаа аж.

Дүрвэгчдийг зөөж байгаатай холбогдуулан Унгарын Засгийн газар Хорватыг шүүмжилж, “Хорват хууль бус цагаачлалыг хөхүүлэн дэмжиж байна” гэжээ. Словенийн Засгийн газар мөн Хорватыг шүүмжиллээ.

Г.Доржханд

Холбоотой мэдээ
Сэтгэгдлүүд