Ах хүү арслангуудын нэрэмжит барилдаанд улсын начин Б.Серик түрүүллээ

Орон нутагт | Баян-Өлгий
bayanulgii@montsame.gov.mn
2018-04-28 12:18:53

Баян-Өлгий /МОНЦАМЭ/. Баян-Өлгий аймгийн Улаанхус сумд засаг захиргааны анхны нэгж байгуулагдсаны түүхт 95 жил, сум байгуулагдсаны 80 жилийн ойн баярыг угтан зохион байгуулсан үндэсний бөхийн барилдаанд "Таван богдын бүргэдүүд" дэвжээ, ШШГЕГ-ын "Сүлд" спорт хорооны бөх улсын начин Б.Серик түрүүллээ.

Барилдаанд улс, аймгийн алдар цолтой 48 бөх зодоглосноос аймгийн заан М.Аманбек үзүүрлэж, аймгийн харцага Д.Бейбит, сумын заан Т.Ардагер нар шөвгөрдлөө.

Улаанхус сумаас төрөн гарсан ах дүү аймгийн хурц арслангууд М.Борбан, М.Азикей, М.Нажикей нарын нэрэмжит уг барилдааныг сумын Иргэдийн Төлөөлөгчдийн Хурал, Засаг даргын Тамгын газар, Улаанхус сумын Нутгийн зөвлөл хамтран зохион байгуулсан байна.

Аймгийн ИТХ-аас тогтоол гарч, Улаанхус сумын 80 жилийн ойг ирэх долдугаар сарын 26-27-ны өдрүүдэд тэмдэглэн өнгөрүүлэхээр болсон юм. Ойн баярыг угтан аймгийн төвд урлаг, соёл, спортын арга хэмжээнүүд явагдаж байна.  Сумын уран бүтээлчид "Улаанхусын уугуулууд" урлагийн концертоо аймгийн Хөгжимт Драмын Театрт энэ сарын 26-ны өдөр тоглолоо. Харин энэ амралтын өдрүүдэд тус сумын нэрэмжит гар бөмбөгийн аймгийн аварга шалгаруулах тэмцээн болох ажээ.

Ө.Нурболат

 


Холбоотой мэдээ