Дорнод аймагт ихэр ботго гарчээ

ОРОН НУТГИЙН МЭДЭЭ | ДОРНОД
167@montsame.mn
2018-03-15 21:05:59
Дорнод /МОНЦАМЭ/. Дорнод аймгийн Баянтүмэн сумын Жаргалант багийн нутаг Ам цагаан дэрс хэмээх газарт хаваржиж байгаа Улсын аварга малчин Х.Мөнхболдын “Ембүү мөнгөн” ингэнээс энэ сарын 4-ний өдөр ихэр цагаан ботго гарчээ.
Ингэ ихэрлэхийг эрт дээр үеэс Монголчууд сайн цагийн эхлэл хэмээн бэлгэдэж ирсэн түүхтэй. Х.Мөнхболд одоогоос 15 жилийн өмнө айлаас ингэ, охин тором худалдаж авч, тэмээн сүргийнхээ эхлэлийг тавьж байсан бол өдгөө 40 гаруй болж өсөөд байна. Нийтдээ 10-аад ингэтэй, жилдээ тав орчим нь ботголдог. Харин энэ хавар ихэр ботго гарсан нь түүнийг төдийгүй Дорнодчуудын магнайг тэнийлгэлээ.
Өнөөдөр Дорнод аймгийн Засаг дарга М.Бадамсүрэн малчны хотонд айлчлан хүндэтгэл үзүүлж, “Мөнгөн буйл” гардуулав.
Х.Мөнхболдын 26 жил мал маллаж, мал сүрэг нь таван төрөлдөө өсч таван мянгад хүрчээ. Түүний аав МУСГЗ, Монголын радиогийн сурвалжлагч ахмад сэтгүүлч Л.Хэрээ Дорнод аймгийн тэмээн сүргийн тоог нэмэгдүүлэх зорилгоор “Тэмээ” дэд хөтөлбөрийг санаачлан эхлүүлсэн хүн юм.
 Тэр ч утгаараа тал нутагт нэгэн зуунд ганц удаа тохиох ховор аз түүний хүүд “олдсон” ч байж мэднэ.
Тэрээр “Уул ус, хангай дэлхий минь түшлээ. Манай тэмээн сүрэг Хэрлэн голынхоо бургасан дунд өвөл хаврыг өнтэй давж, ихэр охин цагаан ботгоор өсөж үржлээ.   
Хэдэн мянган тэмээтэй газарт ч ховор тохиол учир ихэд бэлгэшээж байна” гэсэн юм. Эднийх тэмээгээ ус түлээгээ зөөх, нүүдэл суудалд голдуу ашиглаж байна.  
Дашрамд сонирхуулахад, Дорнод аймагт 1974 оны 2 дугаар сард Цагаан-Овоо сумын малчин Б.Цэвээндоржийн “Галуут” нэгдлийн тэмээний суурьт Улаагчин ингэнээс ихэр ботго гарч байжээ.
Д.Дэлгэрмаа
Холбоотой мэдээ