БНСУ-ын Кёнги аймгийн хурлын төлөөлөгчдийг хүлээж авав

ОРОН НУТГИЙН МЭДЭЭ | ДАРХАН-УУЛ
174@montsame.mn
2019-07-02 17:06:44
Дархан-Уул /МОНЦАМЭ/. Дархан-Уул аймгийн ИТХ, БНСУ-ын Кёнги аймгийн Иргэдийн төлөөлөгчдийн хурал хооронд найрсаг харилцаа тогтоосны 5 жилийн ой энэ жил тохиож байна. Ойн хүрээнд Кёнги аймгийн Хурлын Барилга, тээврийн хорооны гишүүн, Дархан-Уул аймгийн Найрамдлын бүлгийн дарга Шю Хён Рюр, дэд дарга Жон Дэ Вүн нараар ахлуулсан найрамдлын бүлгийн гишүүд тус аймагт айлчилж байна. 

БНСУ-ын Кёнги аймгийн зочдыг аймгийн ИТХ-ын дарга Г.Эрдэнэбат, аймгийн Засаг дарга С.Насанбат, ИТХ-ын Тэргүүлэгчид, төлөөлөгчид хүлээн авч, хүндэтгэлийн уулзалтыг өнөөдөр зохион байгууллаа. 
Уулзалтын эхэнд аймгийн ИТХ-ын дарга Г.Эрдэнэбат нээж хэлсэн үгэндээ, 2014 онд Дархан-Уул аймгийн ИТХ, Кёнги аймгийн Иргэдийн Төлөөлөгчдийн хурал хооронд байгуулсан найрамдалт харилцааны санамж бичгийн хүрээнд хийсэн ажлууд, хөрөнгө оруулалтын талаар дэлгэрэнгүй мэдээллийг зочдод танилцуулсан юм. 
Мөн Дархан-Уул аймгийн болон ИТХ-ын танилцуулга болон 2 орны хоорондын найрамдалт харилцааны түүхэн үйл явдлын талаар танилцуулж, мөн цаашдын хамтын ажиллагааг өргөжүүлэх тухай санал солилцсон
байна.
Түүнчлэн Аймгийн Засаг дарга С.Насанбат Кёнги аймгийн Хурлын Найрамдлын бүлгийн гишүүдэд хандаж, өндөр ашиг шим бүхий МАА-н салбар, тэр дундаа тус аймагт байгуулахаар төлөвлөж буй Арьс шир боловсруулах цогцолбор үйлдвэрт тоног төхөөрөмж, хөрөнгө оруулалт хийх, боловсрол, эрүүл мэндийн салбар дахь хамтын ажиллагааг шинэ түвшинд хүргэх, боловсон хүчнийг мэргэшүүлэх, Дархан-Уул аймгийн иргэдийг тус аймагт ажиллах эрхзүйн орчныг бүрдүүлэх зэрэг саналыг гаргаж, бизнесийн болон аялал жуулчлалын салбарыг өргөжүүлэхэд хамтран ажиллах хүсэлтэй байгаагаа илэрхийллээ. 
Өнгөрсөн хугацаанд Кёнги аймгийн хурлын болон найрамдлын бүлгийн төлөөлөгчид тус аймагт албан ёсны 5 удаагийн айлчлалыг хийсэн бөгөөд мөн манай аймгийн төлөөлөгчид 3 удаа Кёнги аймагт албан ёсны айлчлал хийжээ. 
Хамтын ажиллагааны хүрээнд Кёнги аймгаас өнгөрсөн хугацаанд 2 галын машин, 6 түргэн тусламжийн автомашиныг аймгийн Эрүүл мэнд, Онцгой байдлын газарт хандивлаж, 180 гаруй сая төгрөгийн хөрөнгө оруулалтаар “Од” цогцолбор сургууль, “Монгол-Оюу” сургуульд Ухаалаг ангийг байгуулсан
аж
Дашрамд, Дархан-Уул аймгийн зүгээс Кёнги аймгийн Үндэсний дуу, хөгжмийн чуулгын уран бүтээлчдийг урьж Монгол үндэсний их баяр наадмаар буюу 2018.07.10 өдөр “Найрамдал” урлагийн тоглолтыг Залуучууд театрт зохион байгуулж байсан юм.

Холбоотой мэдээ