Улаанбаатар
Хакерууд чухал мэдээлэл хулгайлсан тухай Ж.Байден мэдэгдэв
ДЭЛХИЙН МЭДЭЭ | УЛС ТӨР
МОСКВА. /Kommersant/. Хакерууд
томоохон кибер халдлага үйлдсэний улмаас эрх баригчид, бизнес эрхлэгчид
чухал мэдээллээ алдлаа гэж АНУ-ын Ерөнхийлөгчөөр сонгогдсон Жозеф Байден
мэдэгджээ.
“Халдлагыг эртнээс нарийн
төлөвлөжээ. Халдлага үйлдсэн этгээдүүд холбооны эрх баригчдыг гэнэдүүлж чаджээ. Хакерууд технологийн салбар, хувийн бизнес эрхлэгчид, засгийн газрын байгууллагуудаас
чухал мэдээлэл хулгайлсан байна” хэмээн тэрбээр мэдэгдэв.
Энэ халдлагад Орос улс холбоотой байж болзошгүй хэмээн одоогийн засаг захиргаа мэдэгдсэнийг Ж.Байден анхааралдаа авчээ.
“Д.Трампын Засаг захиргаа кибер
аюулгүй байдлын асуудлыг эн тэргүүнд тавьж чадсангүй. Тэд Цагаан ордон, Төрийн
Департаментын кибер аюулгүй байдал эрхэлсэн албан тушаалтнуудыг ажлаас нь халж, албан тушаалаас нь бууруулах замаар энэ асуудлыг орхигдуулжээ” хэмээн тэрбээр мөн мэдэгдсэн байна.
Тухайлбал, АНУ-ын Дотоодын аюулгүй байдлын яамны кибер аюулгүй байдал, дэд бүтэц хариуцсан агентлагийн тэргүүн Кристофер Кребсийг Д.Трамп албан тушаалаас нь огцруулсныг Ж.Байден сануулан дурджээ.
Хариу арга хэмжээ
“Кибер халдлага хэдий хэмжээний хохирол учруулж, халдлагын цаана хэн албан
ёсоор хариуцлага хүлээх нь тодорхой болсны дараа бид тэдэнд хариу барина. Бид
ижил хариу барьж магадгүй” хэмээн Ж.Байден хэлсэн байна.
Түүнчлэн эрх баригчид нөхцөл байдлыг хяналтандаа авсан гэх ямар ч нотолгоо алга
хэмээн тэрбээр мэдэгдэхийн сацуу Д.Трампын асуудалд хайнга хандаж, дутуу үнэлж
байгааг нь шүүмжилжээ.
"Кибер орон зайд дүрэм журам зөрчсөн этгээдүүдэд хариуцлага тооцдог зохистой
байдлыг хангах олон улсын тогтолцоог бид холбоотнуудтайгаа бий болгохыг зорьж
байна” гэж Ж.Байден мөн мэдэгдэв.
