БНХАУ-ын Датун хоттой хамтын ажиллагааны талаар санал солилцов
ОРОН НУТГИЙН МЭДЭЭ | ХОВДХовд/МОНЦАМЭ/.БНХАУ-ын Шанси мужийн Датун хотын гадаад харилцааны албаны Тамгын газрын дарга Лу фен тэргүүтэй төлөөлөгчид Ховд аймагт айлчиллаа.
Албаны төлөөлөгчдийг Ховд аймгийн ИТХ-ын дарга Г.Пүрэвганди, аймгийн ИТХ-ын нарийн бичгийн дарга Б.Сандагсүрэн болон албаныхан хүлээн авч уулзан аймаг орны хөгжил дэвшил, онцлог, бүтээн байгуулалтын тухай дэлгэрэнгүй мэдээлэл өгч хамтын ажиллагааны талаар харилцан санал солилцов.
Монгол Улс БНХАУ-ын дэвшүүлсэн "Бүс ба зам" санаачилгыг дэмжиж томоохон төсөл хэрэгжүүлэх, эдийн засгийн коридор байгуулах, харилцан ашигтай хамтран ажиллах уулзалт хэлэлцээр хийж буй бөгөөд хамтын ажиллагааны хүрээнд БНХАУ-ын Шанси мужийн Датун хоттой Ховд аймаг хамтран ажиллах,хоёр хотын найрамдалт харилцаа тогтоох санамж бичгийг энэ оны 3 дугаар сард Бээжин хотноо болсон хоёр улсын засгийн газрын хэмжээний уулзалтын үеэр байгуулж байжээ.
А.Бямбасүрэн