НҮБ-ын Ерөнхий Ассамблейн тэргүүний сонгуульд хоёр эмэгтэй өрсөлдөж байна

ДЭЛХИЙД | УЛС ТӨР
dorjkhand@montsame.mn
2018-04-13 11:41:48
НҮБ. /Синьхуа/.  НҮБ-ын Ерөнхий Ассамблейн ерөнхийлөгчөөр сонгогдохоор хоёр эмэгтэй нэр дэвшигч өрсөлдөж байна гэж НҮБ-ын хэвлэлийн төлөөлөгч мэдэгдсэнийг “Синьхуа” агентлаг уламжлав.

Гондурас улсаас НҮБ-д суугаа байнгын төлөөлөгч Мэри Элизабет Флорес Флэйк, Эквадор улсын Гадаад харилцааны сайд Мария Фернанда Эспиноса Гарсис нар энэ оны зургадугаар сарын 5-нд болох НҮБ-ын Ерөнхий Ассамблейн 73 дахь удаагийн ерөнхийлөгчийн сонгуульд өрсөлдөж байгаа аж.
 
Энэ хоёр хүний нэг нь 2017 оны есдүгээр сард болсон сонгуулиар НҮБ-ын Ерөнхий Ассамблейн 72 дахь ерөнхийлөгчөөр сонгогдсон Словакийн дипломатч Мирослав Лайчакийн халааг авна. 1945 оноос хойш Ерөнхий Ассамблейн тэргүүнээр ердөө гурван л эмэгтэй сонгогдож байжээ.

НҮБ-ын Ерөнхий Ассамблейн тэргүүнийг жил тутам тус ассамблейн төлөөлөгчдийн саналаар  сонгодог байна. Ерөнхий Ассамблей нь НҮБ-ын бодлого боловсруулах, улс орнуудын төлөөлөгчдийн санаа бодлыг сонсдог гол газар билээ. НҮБ-ын гишүүн 193 улс орноос бүрддэг тус газар нь олон улсын асуудлууд, тухайлбал энх тайван ба аюулгүй байдлын асуудлаар олон талт хэлэлцүүлэг өрнүүлдэг юм.

Г.Доржханд
Холбоотой мэдээ