Улаанбаатар
Сэлэнгэ аймгийн 8 сумын 150 гаруй өрхөд бэлэн мөнгөний тусламж олгоно
ОРОН НУТГИЙН МЭДЭЭ | СЭЛЭНГЭ
Их Британи болон Монголын Улаан загалмайн нийгэмлэгийн Гамшгийн менежментийн хөтөлбөрийн хамтарсан баг Сэлэнгэ аймгийн зудтай сумдад энэ сарын 25-наас 26-ны өдрүүдэд ажилласан байна.
Дээрх хамтарсан багийнхан Сэлэнгэ аймгийн цас ихтэй, зудтай байгаа Жавхлант, Шаамар сумдад ажиллаж, тус сумдын малчин өрхүүдээр явж зудын байдалтай газар дээр нь танилцаж үнэлгээ, шинжилгээ хийжээ.
Энэхүү ажлын үр дүнд аймгийн Улаан загалмайн хорооноос гаргасан судалгааны дагуу Сэлэнгэ аймгийн 8 сумын 152 өрхөд хөдөлмөрийн хөлсний доод хэмжээний бэлэн мөнгөний тусламжийг олгохоор санал дүгнэлт гаргасан байна.
Мөн дараагийн 8 сумын 240 өрхөд адил тусламжийг олгуулахаар Олон улсын Улаан загалмайн нийгэмлэгтээ санал тавьж ярилцахаар болжээ. Өвөлжилт хүндэрсэн сумдад ажиллах хамтарсан багийн бүрэлдэхүүнд Их Британийн УЗН-ийн Гамшгийн менежментийн хөтөлбөрийн зохицуулагч Петер Жонес, Логистик хариуцсан менежер Том Макгрегор, Амьжиргааг дэмжих хөтөлбөрийн зохицуулагч Файнбар Швини, Хяналт үнэлгээ төлөвлөлтийн зохицуулагч Элистрэйл Панч болон аймгийн ИТХ-ын дарга, аймгийн Улаан загалмайн хорооны тэргүүн Г.Бямбаа, аймгийн УЗХ-ны дарга Б.Түвшинжаргал, МУЗН-ийн Гамшгийн бэлэн байдал, тусламжийн хөтөлбөрийн баг ажилласан байна.
Ч.Отгонцэцэг
