Улаанбаатар
Туркт F-16 сөнөөгч онгоцуудыг нийлүүлэхээр шийдвэрлэжээ
ДЭЛХИЙН МЭДЭЭ | УЛС ТӨР
ИСТАНБУЛ, 2024 оны хоёрдугаар сарын 13 /TASS/. АНУ-ын Конгресс F-16 сөнөөгч онгоцыг Турк улсад худалдах гэрээг баталсан гэдгийг Туркийн Ерөнхийлөгч Режеп Тайип Эрдоган даваа гарагт болсон засгийн газрын хуралдааны дараа батлан мэдэгдсэнийг TRT Haber суваг дамжуулжээ.
Шинэ 40 ширхэг, шинэчлэн сайжруулсан 79 ширхэг F-16 загварын онгоцыг Турк улсад худалдах гэрээг Конгресс баталсан тухай Анкарад суугаа АНУ-ын Элчин сайд Жеффри Флейк ням гарагт мэдээлсэн байна.
"F-16-тай холбоотой бидний хүсэлт АНУ-аас гаргасан нааштай шийдвэрээр баталгаажсанд бид баяртай байна. Хязгаарлалтыг цуцалсны дараа Туркийн батлан хамгаалах салбар илүү эрчимтэй хөгжинө" гэж Эрдоган хэлжээ.
Туркийн Гадаад хэргийн сайд Хакан Фидан мэдэгдэхдээ, АНУ-ын Конгрессоос сөнөөгч онгоцтой холбоотой шийдвэр хоёрдугаар сарын 10 гэхэд гарна гэж байсан юм. Туркийн парламент НАТО-д элсэх Шведийн хүсэлтийг баталсны дараа АНУ F-16-г худалдахаар урьдчилсан тохиролцсон гэдгийг тэрбээр онцолж байв. Туркийн тал Шведийн хүсэлтийг нэгдүгээр сард соёрхон баталсан юм.
Турк улс хэдэн жилийн өмнө АНУ-аас 40 ширхэг F-16 Block 70 сөнөөгч онгоц, одоо байгаа ийм загварын нисэх онгоцуудаа шинэчлэхийн тулд 80 иж бүрдлийг худалдан авах хүсэлт гаргажээ. АНУ-ын Төрийн нарийн бичгийн дарга Энтони Блинкений мэдэгдэж байснаар, Конгрессын зарим гишүүн "сөнөөгч онгоцуудыг нийлүүлэхдээ Шведийг НАТО-д элсүүлэх асуудлаар Анкарагийн гаргах шийдвэрийг харгалзан үзэхийг" уриалж байсан юм.
