Улаанбаатар
Н.Алтанхуягийг 7 тэрбум төгрөгийг хэрхэн зарцуулснаа тайлагнахыг шаардав
МОНГОЛЫН МЭДЭЭ | УЛС ТӨРАН-ын гишүүд дэмжигчдийн холбооноос өнөөдөр Үндэсний мэдээллийн төвд хэвлэлийн бага хурал хийх үеэр Ардчилсан намын дарга асан Н.Алтанхуягийг намын байр барих 7 тэрбум төгрөгийг хэрхэн зарцуулсанаа тайлагнахыг шаардлаа.
Анх 180 мянган гишүүний хандиваар "Ардчиллын өргөө" нэртэй намын шинэ байр барихаар 2009 оны 12 дугаар сарын 6-ны өдөр шавыг нь тавьжээ. Төлөвлөгөөнд тусгагдсанаар уг барилга 2012 оны сонгуулиас өмнө ашиглалтад орох байсан ч одоог хүртэл "Шинэ дэвшил" холбооны байрыг түрээслэн үйл ажиллагаагаа явуулж байгаа аж.
Тухайн үеийн удирдлагууд Соёлын төв өргөөний хүзүүвчин дэх байр болон 3350 метр.кв газрын гэрчилгээг нэр бүхий арилжааны банкинд 7 тэрбум төгрөгөөр худалдсан. Үүнээс 2,4 тэрбум төгрөгийг намын ажилд зарцуулсан гэх баримтыг гишүүд дэмжигчид нь олсон байна.
Тиймээс Н.Алтанхуяг дээрх барилгад зарцуулах ёстой байсан хөрөнгийг хэрхэн зарцуулсанаа тайлагнахын зэрэгцээ АН-ын 180 мянган гишүүнээс уучлал гуйн, хохирлоо барагдуулах хэрэгтэй гэв.
Б.Гаваа
Гэрэл зургийг Т.Чимгээ
