Улаанбаатар
Монгол Улсын 10 дахь дархан аварга Н.Батсуурийн цолын мялаалга наадам Увс аймагт болно
МОНГОЛЫН МЭДЭЭ | СПОРТ
Улаанбаатар, 2024 оны наймдугаар сарын 7 /МОНЦАМЭ/. Монголын үндэсний бөхөд дархан аварга цолтой 10 бөх бий.
Монгол бөхийн дээд цолд хүрсэн 10 дахь бөхөөр Увс аймгийн Ховд сумын харьяат дархан аварга Н.Батсуурь тодорсон билээ. Тэрбээр Ардын хувьсгалын 103 жилийн ойн баяр наадамд улсын арслан Б.Орхонбаяраар ес даван түрүүлж, дархан аварга болсныг бөх сонирхогчид санаж байгаа болов уу.
Тэгвэл шинэхэн дархан аваргын цолын мялаалга наадам энэ сарын 15-нд Увс аймгийн Улаангом хотноо болох гэж байна. Увс аймгаас төрөн гарсан хоёр дахь дархан аваргынхаа цолын мялаалгыг нутгийнхан нь “Бөхийн баяр” хэмээн нэрлэжээ. Энэхүү наадмаар улс, аймгийн алдар цолтой 128 бөхийн барилдаанаас гадна өсвөр болон сумын цолтон 64 бөхийн барилдаан болох аж.
Өдгөө 36 настай түүний
хувьд 2014 онд анх түрүүлж арслан, 2018 онд хоёр дахиа түрүүлэн улсын аварга,
2019 онд гурав дахь удаагаа түрүүлэн даян аварга цолд хүрсэн бол үүнээс таван
жилийн дараа төрийн наадмын дөрөв дэх түрүүгээ авснаар дархан аварга болов. Н.Батсуурь
нь улсын наадамд дөрөв түрүүлсэн гурван дархан аваргын нэг. Түүнээс өмнө дархан
аварга Г.Өсөхбаяр, Д.Цэрэнтогтох нар дөрөв түрүүлжээ. Улсын наадамд түрүүлсэн
амжилтаараа Н.Батсуурийн өмнө бичигдэх дархан аварга цолтой таван бөх бий.
