Шилдэг бүтээл болон шилдэг бүтээл бүхий хөтөлбөртэй радио, телевизийг шалгаруулав

Монголын мэдээ | Улс төр
munkhbaatar@montsame.gov.mn
2020-08-10 13:35:20
@s_munkhbaatar

Улаанбаатар /МОНЦАМЭ/. Монгол Улсын Ерөнхий сайд У.Хүрэлсүхийн ивээлд болсон Үндэсний өв соёл, түүх, уламжлалыг илэрхийлсэн шилдэг бүтээл болон шилдэг телевиз, радио шалгаруулах уралдааны дүн гарч шилдгүүдэд шагналыг нь гардууллаа.


Уралдааныг Үндэсний шилдэг бүтээл бүхий хөтөлбөртэй телевиз, телевизийн үндэсний шилдэг бүтээл, телевизийн хүүхдэд зориулсан үндэсний бүтээл, үндэсний шилдэг бүтээл бүхий хөтөлбөртэй радио, радиогийн үндэсний шилдэг бүтээл, радиогийн хүүхдэд зориулсан үндэсний бүтээл, орон нутгийн телевизийн шилдэг бүтээл, орон нутгийн телевизийн хүүхдийн шилдэг бүтээл, орон нутгийн радиогийн шилдэг бүтээл гэсэн төрлөөр явуулж дараах бүтээлийг шилдгээр тодруулсан байна. 


Шагналыг Монгол Улсын Ерөнхий сайд У.Хүрэлсүх гардуулж баяр хүргэв. Тэрээр оюун санааны дархлаа бол тусгаар тогтнолын баталгаа гэдгийг тодотгоод үндэсний өв соёл, түүх, уламжлалыг илэрхийлсэн бүтээлийг нэмэгдүүлэх, ард иргэд, ялангуяа хүүхэд залууст эх оронч үзэл, үндэсний бахархлыг төлөвшүүлэхэд чиглэсэн бүтээлийг дэмжинэ хэмээв. 


Шилдэг бүтээлүүд нь ёс заншил, түүх, уламжлал, өв соёлыг орчин үеийн чиг хандлагатай хослуулан илэрхийлсэн, нийгэм, түүх, соёл, урлаг, шинжлэх ухааны үнэ цэнэ, ач холбогдолтой, эх оронч үзэл, бахархлыг төлөвшүүлэх, танин мэдүүлэх, соён гэгээрүүлэх, боловсрол олгох, сурган хүмүүжүүлэхэд чиглэсэн байх ёстой. Шилдэг бүтээл болон шилдэг бүтээл бүхий радио, телевизийг жил бүрийн Сар шинийн баяр, Үндэсний их баяр наадмыг тохиолдуулан шалгаруулдаг юм. Шүүгчдийн комиссыг Монгол Улсын Соёлын гавьяат зүтгэлтэн, сэтгүүлч, редактор Г.Золжаргал ахалж байна гэж Засгийн газрын Хэвлэл мэдээлэлтэй харилцах хэлтсээс мэдээллээ.


I.  ОРОН НУТГИЙН ТЕЛЕВИЗ, РАДИОГИЙН ҮНДЭСНИЙ ШИЛДЭГ БҮТЭЭЛ


1.  Сүхбаатар аймгийн BBS телевизийн “Ээмэг хонгор” нэвтрүүлэг


2.  “Орон нутгийн телевизийн хүүхдийн шилдэг бүтээл” төрөлд Дорнод аймгийнЗалуучууд, уран бүтээлийн нэгдлийн “Зуни, Туни хоёр” нэвтрүүлэг


3.  “Орон нутгийн радиогийн шилдэг бүтээл” төрөлд Хөвсгөл аймгийн Сторм ФМ-105 “Амьд харилцаа” нэвтрүүлэг


II.  РАДИО, ТЕЛЕВИЗИЙН ХҮҮХДЭД ЗОРИУЛСАН ҮНДЭСНИЙ ШИЛДЭГ БҮТЭЭЛ


1.  Гэр бүлийн радио 104.5-ын “Дүрэмгүй хонх” нэвтрүүлэг


2.  Марчаахай ХХК-ийн “Монгол наадам” телевизийн нэвтрүүлэг


III. РАДИО, ТЕЛЕВИЗИЙН ҮНДЭСНИЙ ШИЛДЭГ БҮТЭЭЛ


1.  Арга билиг 95.7 радиогийн  “Адуучин хүүд тохиолдсон явдал” нэвтрүүлэг


2.  Контент Хаус Монголиа ХХК-ийн “Эрдэнийн судар оршивой” телевизийн нэвтрүүлэг


IV.  ҮНДЭСНИЙ ШИЛДЭГ БҮТЭЭЛ БҮХИЙ ХӨТӨЛБӨРТЭЙ РАДИО, ТЕЛЕВИЗ


1.  UBM радио 89.3


2.  Монгол Эйч Ди ТВ телевиз тус тус шалгарлаа. 

Холбоотой мэдээ