Унгарт жил бүр 100 оюутан суралцуулна

Видео
admin@example.com
2015-06-26 09:51:36

Унгар Улсын Ерөнхийлөгч Янош Адер гэргий Анита Херцегийн хамт Монгол улсад албан ёсны айлчлал хийж байна.
Хоёр улсын хооронд 1950 оны дөрөвдүгээр сард дипломат харилцаа тогтоосноос хойш 65 жил өнгөрч байна. Эн ойтой давхцан  тус улсын Ерөнхийлөгчийн албан ёсны айлчлал тохиож байгаагаараа онцлог юм.

Унгарын Ерөнхийлөгч Янош Адерын Монгол Улсад хийж буй албан ёсны айлчлал нь 1994 онд Унгарын Ерөнхийлөгч асан Гөнц Арпадын Монголд хийсэн айлчлалаас хойш 21 жилийн дараа Төрийн тэргүүний түвшинд хийж буй гэдгээрээ онцлог юм. Унгарын Ерөнхийлөгч Янош Адерын  Азид хийх айлчлалын төлөвлөгөөнд заавал очих орны нэг нь  Монгол Улс байжээ. Манай улсын хувьд  Монгол Улсын Ерөнхийлөгч Ц.Элбэгдорж өнгөрсөн оны аравдугаар сард Унгар Улсад албан ёсны айлчлал хийсэн байдаг.
Монгол Улсын Ерөнхийлөгч хүндэт зочноо угтан авсны дараа ганцаарчилсан уулзалт хийлээ. Уулзалтаар хоёр орны хооронд уламжлалт найрсаг харилцаа, хамтын ажиллагаа хөгжиж байгаад талууд сэтгэл хангалуун байгаагаа илэрхийлцгээлээ. Манай улс Унгар Улс Европын холбооны гишүүний хувьд гуравдагч хөрш хэмээн харилцааны түвшинг тодорхойлж байна. Унгар Улс Улаанбаатар дахь Элчин сайдын яамаа 2006 онд хаасан боловч энэ оны долдугаар сард сэргээн нээхээр болсон талаар энэ уулзалтын үеэр ярьсан байна. Уулзалтын дараа  хоёр  улсын Ерөнхийлөгч нар албан ёсны хэлэлцээ хийлээ. Албан ёсны хэлэлцээний  үеэр хоёр орны харилцаа, хамтын ажиллагааг гүнзгийрүүлэн хөгжүүлэх шинэ боломж, бололцоо болон олон улсын тулгамдсан асуудлаар дэлгэрэнгүй ярилцаж, санал солилцлоо. Худалдаа, эдийн засаг, хөрөнгө оруулалт, боловсрол, байгаль орчин, хөдөө аж ахуй болон бусад салбарын харилцааг хөгжүүлэх талаар ярилцаж, энэ нь хоёр орны уламжлалт найрсаг харилцааг шинэ шатанд гаргахад чухал ач холбогдолтой хэмээн үзэв.
Мөн Монгол Улсын Боловсрол, соёл, шинжлэх ухааны яам, Унгар Улсын Боловсон хүчний яам хооронд боловсрол, соёл, шинжлэх ухааны салбарт 2015-2017 онд хамтран ажиллах хөтөлбөрийг байгуулахаар албан ёсны хэлэлцээний үеэр тохиролцлоо. Ингэснээр  Унгарын Засгийн газрын тэтгэлгээр жил бүр Монголын 100 хүртэл оюутан Унгарт суралцах боломж нээгдэх юм гэж МУЕХМА наас мэдээлжээ.

Холбоотой мэдээ
Сэтгэгдлүүд