Улаанбаатар
СЭЛЭНГЭ: Шинэ хичээлийн жилээс аймгийн Засаг даргын нэрэмжит олимпиадыг тогтмол зохион байгуулна
ОРОН НУТГИЙН МЭДЭЭ | СЭЛЭНГЭ
Сүхбаатар, 2025 оны наймдугаар сарын 28
/МОНЦАМЭ/. Сэлэнгэ аймаг 2026 оноос эхлэн аймгийн Засаг даргын нэрэмжит
олимпиадыг тогтмол зохион байгуулж, амжилттай оролцсон сурагчид, бэлдсэн багш
нарыг урамшуулдаг ажлыг зохион байгуулахаар төлөвлөжээ.
Мөн багшийн ажил мэргэжлийн
үнэлэмжийг дээшлүүлэх, ур чадварыг нэмэгдүүлэх чиглэлээр гадаад хамтын
ажиллагааны хүрээнд сургалт, мэргэжил дээшлүүлэх, туршлага судлах ажлуудыг
тогтмол зохион байгуулан ажиллана хэмээн аймгийн Засаг дарга бага хурлын индэр
дээрээс онцлон тэмдэглэлээ.
Өнөөдөр Сэлэнгэ аймаг хичээлийн шинэ
жилийн босгон дээр уламжлал болгон зохион байгуулдаг Багш нарын бага хурлаа
хийж байна.
Тус хуралд Сэлэнгэ аймгийн
боловсролын салбарын 465 багш, боловсролын байгууллагын удирдлага төлөөллүүд
оролцож,
-2024-2025 оны хичээлийн жилийн
онцлох ажил, арга хэмжээ, үр дүн, цаашдын зорилт,
-Сургуулийн өмнөх болон бага
боловсролын сургалтын хөтөлбөрийн
шинэчлэлтийн үнэт зүйл, зарчим, зорилго, хүрэх үр дүн,
-Багш, удирдах ажилтны харилцаа, ёс
зүй, ёс зүйн хорооны үйл ажиллагааг сайжруулах арга зам,
-2025-2026 оны хичээлийн жилд
дэвшүүлэх, зорилго, зорилт анхаарах асуудлуудын талаар харилцан санал солилцож
байна.
2025-2026 оны хичээлийн шинэ жил
эхлэхэд аймгийн 31 сургуульд 22 мэргэшлийн 144 багш дутагдаж байгаа судалгаа
байгаа. Иймээс багшлах боловсон хүчнийг авч ажиллуулах, мэргэшлийн багшаар
хангах ажлыг зохион байгуулж байгаа.
Мөн улс орны хэмжээнд хэрэгжиж байгаа багшийн мэргэжил эзэмших оюутан залуусыг дэмжих томоохон төсөл хөтөлбөрүүдийг аймагтаа татах, аймгийнхаа боловсролын салбарын албан хаагчид, багш нарыг бүх талаар дэмжин ажиллах зэрэг бодлогыг аймгийн удирдлагын багаас баримталж байна.
