Жаргалант, 2025 оны наймдугаар сарын 29 /МОНЦАМЭ/. Ховд аймгийн нутаг дэвсгэрийн 70 гаруй хувьд бэлчээрийн даац олон дахин хэтэрсэн нь өвөлжилт, хаваржилтад сөргөөр нөлөөлж, эрсдэл үүсэхээр байна.

Иймд орон нутгийн удирдах ажилтнууд, малчид зөв зохион байгуулалт хийж, өвс, тэжээл нөөцлөх, малын тоог бууруулж эдийн засгийн эргэлтэд оруулах, хил залгаа бэлчээрийн нөөцтэй нутаг руу отор нүүдэл хийх зэргээр зудын эрсдэлийг эртнээс тооцож урьдчилан сэргийлэхийг Ховд аймгийн Ус, цаг уур, орчны шинжилгээний төвөөс зөвлөлөө.

Монгол Улсын Засгийн газрын 286 дугаар тогтоол дагуу Ус, цаг уур, орчны судалгаа мэдээллийн хүрээлэнд Ховд аймгийн 2025-2026 оны өвөл, хаврын бэлчээрийн даацыг баг тус бүрийн бэлчээрийн талбайн хэмжээ, ургамлын ургалт, малын тоо, бэлчээр ашиглах хугацаа зэрэг мэдээлэлд үндэслэн тооцоолж, зураглал гаргажээ.

Энэ зун Ховд аймгийн нутаг дэвсгэрийн 20 орчим хувьд гантай, 80 гаруй хувьд гандуу байлаа. Бэлчээрийн даацыг тодорхойлсон дүнгээс үзвэл нутгийн 10 гаруй хувьд мал өвөлжилт, хаваржилт хэвийн байна.
Харин нутгийн 13.3 хувьд бэлчээрийн даац 1-3 дахин хэтэрсэн ба өөрийн нутагт өвөлжиж, хаваржих боломжтой ч өвс, тэжээл шаардлагатай.
Мөн нутгийн 73.9 хувьд бэлчээрийн даац гурваас дээш олон дахин хэтэрсэн нь өвөл, хаврын улиралд мал маллахад эрсдэл үүсэхээр байгааг судалгаагаар тогтоожээ.

Бэлчээрийн даацыг сум, багийн дүнгээр авч үзвэл Эрдэнэбүрэн, Мянгад, Дөргөн, Жаргалант, Чандмань, Дуут, Мөнххайрхан, Мөст сумын ихэнх нутгаар, Ховд сумын Цагаан бургас, Баруун салаа, Улаан бураа, Дунд ус баг, Буянт сумын Цагаан эрэг, Наран хайрхан, Норжин хайрхан, Манхан сумын Баян гол, Тахилт, Ботгон, Төгрөг гол, Булган сумын Баян гол багийн хойд болон баруун тал, Бүрэн хайрхан багийн нутгаар бэлчээрийн даац олон дахин хэтэрсэн тул мал өвөлжилт, хаваржилтын нөхцөл хүндрэхээр байна.

Түүнчлэн Ховд сумын Баян булаг, Манхан сумын Улаан хүрээ, Зэрэг сумын Гүвээ, Бураа, Дарви сумын Дэлгэр, Цэцэг сумын Баян овоо, Баян гол, Цэцэг гол, Хажинга багийн баруун талын нутгаар, Алтай сумын Бодонч, Тахилт, Барлаг, Үенч сумын нийт нутгаар, Булган сумын Алаг толгой багийн нутгаар бэлчээрийн даац 3-5 дахин хэтэрчээ.

Буянт сумын Нарийн гол, Зэрэг сумын Эхэн, Дарви сумын Мөрөн, Булаг, Булган, Цэцэг сумын Хажинга, Булган сумын Баян гол багийн зүүн талын нутаг, Далт, Баян судал, Байтаг багийн нутгаар бэлчээрийн даац 1-3 дахин хэтэрсэн байна.

Харин Зэрэг сумын Бургасан багийн Зэргийн гол дагуу нутаг, Дарви сумын Мөнгөн аяга, Алтай сумын Алтан гадас багийн нутгаар бэлчээр бага зэргийн хүрэлцээтэй байгаа бол Манхан сумын Зэргийн гол дагуух нутгаар бэлчээр бага зэргийн нөөцтэй гарч, зэргэлдээх сум, багуудын мал отроор өвөлжих боломжтой юм.