Зээлийн хүүг бууруулах шаардлага хүргүүлэв

Монголын мэдээ | Эдийн Засаг
ariunbold@montsame.mn
2016-05-23 13:24:32

Монголын зээлдэгчдийн холбооноос арилжааны банкуудын зээлийн хүүг бууруулах арга хэмжээ авахыг УИХ-н гишүүдээс шаардаж, бичиг хүргүүлжээ.

Монгол Улсын 700 мянган иргэн арилжааны банкуудаас ямар нэгэн хэлбэрээр зээл авсан байна. Эдийн засгийн хүндрэлтэй байгаа үед иргэд зээлээ төлж чадахгүй орон сууц, хашаа байшингаа арилжааны банканд өгөх тохиолдол улам бүр нэмэгдэх болжээ. Монголын зээлдэгчдийн холбооноос арилжааны банкуудыг зээлийн хүүгээ бууруулах шаардлага хүргүүлсэн ч банкуудаас боломжгүй гэсэн хариулт иржээ. Тиймээс УИХ-ын гишүүдийг хууль, эрхзүйн орчинд өөрчлөлт оруулах замаар зээлийн хүүг бууруулахыг шаардаж байна хэмээн тус холбооны тэргүүн Ц.Солонго хэллээ.

Тэрбээр, “Эдийн засгийн хүндрэлтэй үед хамгийн ашигтай ажиллаж байгаа нь банк. Иргэд арилжааны банкуудад жилд дунджаар 15 хувийн хүү төлдөг. Бидний хийсэн судалгаагаар арилжааны банкууд жил 20-300 тэрбум төгрөгийн цэвэр ашигтай ажиллаж байна. Иргэд зээлээ төлж чадахгүй тохиолдолд хашаа байшин, орон сууц гэх мэт үнэт хөрөнгийг нь авч байгаа тул банк хэзээ ч алдагдал хүлээхгүй. Тиймээс зээлийн хүүгээ бууруулах хэрэгтэй” хэмээв.

Зээлийн хүүг хэдэн хувь болгож бууруулах боломжтой вэ гэсэн сэтгүүлчийн асуултад тэрбээр, “Бидэнд яг нарийн судалсан зүйл байхгүй. Зээлийн хүүг шинжлэх ухааны үндэслэлтэйгээр нарийн тооцох хэрэгтэй. “Сайн малчин” хөтөлбөрийн хүрээнд 19 хувь байсан зээлийг хүүг 10 болгож бууруулж чадсан. Тиймээс энэ мэт сайн туршлагадаа тулгуурлан бусад зээлийн хүүг бууруулах боломжтой гэж үзэж байна” хэмээн хариулав.

Ч.Ариунболд

Холбоотой мэдээ