Ulaanbaatar
Ерөнхийлөгч У.Хүрэлсүх Их жанжин Д.Сүхбаатарын дурсгалын самбарт цэцэг өргөв
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Монгол Улсын Ерөнхийлөгч У.Хүрэлсүх Оросын Холбооны Улсын нийслэл Москва хотын төвд байрладаг “Метрополь” зочид буудлын хананд байрлуулсан Их жанжин Д.Сүхбаатарын дурсгалын самбарт цэцэг өргөв.
Самбарт “Энэ байранд 1921 оны 11 дүгээр сард Зөвлөлт Социалист Бүгд Найрамдах Холбоот Орос Улс, Монгол Улс хооронд найрамдалт харилцаа тогтоох хэлэлцээ болсон бөгөөд уг хэлэлцээнд МАХН болон Монгол Ард Улсыг үүсгэн байгуулагч Д.Сүхбаатар оролцсон юм” гэж бичин, БНМАУ, ЗСБНХУ-ын Төрийн сүлдийг сийлсэн байдаг юм.
С.Данзан, Д.Сүхбаатар тэргүүтэй төлөөлөгчид 1921 оны 11 дүгээр сарын 5-нд “Метрополь” зочид буудалд “Монгол-Оросын найрамдалт харилцаа тогтоох тухай Монгол Улс, Зөвлөлт Орос Улсын Засгийн газар хоорондын гэрээ”-г байгуулах хэлэлцээ хийсэн түүхтэй. Гэрээг байгуулсны 50 жилийн ойгоор буюу 1971 онд зочид буудлын хананд дурсгалын самбарыг байрлуулсан байна. Дурсгалын самбарыг ЗХУ-ын уран барималч Г.А.Огнев, зураг төслийн инженер Г.А.Мурадов нар бүтээжээ.
Монгол Улсын дээд, өндөр түвшний төлөөлөгчид Москва хотод зочлох үеэрээ дурсгалын самбарт цэцэг өргөж, хүндэтгэл үзүүлдэг уламжлал тогтсон юм.
