Улаанбаатар
Гурван ихэр тугал гарчээ
ОРОН НУТГИЙН МЭДЭЭ | АРХАНГАЙБилгийн тооллын Хаврын тэргүүн сарын шинийн нэгний өдөр буюу Аргын тооллын 2 дугаар сарын 27-ны даваа гаригт Архангай аймгийн Их тамир сумын Хөх нуур багийн "Тооройт" хэмээх газар өвөлжиж буй малчин Ж.Төмөрбаатарынд "Ихэр" нэртэй эвэртэй хар сарлагийн үнээнээс 3 ихэр тугал гарчээ.
Тугалнуудын хоёр нь хөх халзан зүстэй эр , нэг нь хар зүстэй эм гарсан байна.
Гурван ихрийн эх нь 2009-2010 оны зудын үед бяруу байсан бөгөөд тэдний үхэр сүргээс бараг ганцаараа өвөл хаврын зудын эрсдлийг тэсвэрлэн үлдэж байжээ. "Ихэр" нэртэй эвэртэй хар сарлаг 7 дахь удаагаа тугаллаж байгаа юм. Хар сарлагийг төдийгүй эхийг нь ч бас "ихэр "гэж нэрлэн дууддаг байсныг малчны эхнэр ярьжээ.
Тугалнуудын эцэг мал нь тус багийн 1500 гаруй сарлагтай Улсын аварга малчин Ц.Доржсүрэн гуайн үхэр сүргийнх ажээ.
Б.Гэрэлт-Од
