Улаанбаатар
Монголын тээвэрчид БНХАУ-аар дамжин Ази, Европ руу тээвэр хийнэ
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Зам, тээврийн хөгжлийн сайд С.Бямбацогт БНХАУ-ын Тээврийн сайд Ли Шяопинтай уулзаж, Монгол, Хятадын Засгийн газар хоорондын автотээврийн хэлэлцээрийн протоколд гарын үсэг зурлаа.
Ингэснээр Монгол Улсад бүртгэлтэй автомашинаар БНХАУ-ын нутгаар дамжин өнгөрөх тээвэрлэлт хийх, хятадын нутаг дэвсгэрээс гуравдагч улс руу тээвэрлэлт хийх боломж бүрдэж байна. Мөн аялал жуулчлалын захиалгат тээвэр буюу наймаас дээш хүний суудалтай машинаар Бээжин, Тяньжин, Хөххот болон бусад хотууд руу тээвэрлэх боломжтой болж байгаа юм.
Түүнчлэн далайд гарцгүй манай орны хувьд монголын тээвэрчид БНХАУ-ын нутгаар дамжин далайн боомтоос, эсхүл далайн боомт руу авто замаар тээвэрлэлт хийх боломж бүрдлээ. Тодруулбал, БНХАУ-ын нутгаас Казахстан, Киргиз зэрэг улсаар дамжин Европын улсууд руу тээвэрлэлт хийх юм. Ингэснээр Казахстан, Киргиз, Узбекистан зэрэг улсаас Монгол Улс руу хийж буй тээвэрлэлтийн зай 1200-1500 орчим км-ээр богиносох тул тээврийн үнэ буурч, энэ хэрээр өргөн хэрэглээний бараа бүтээгдэхүүний үнэ хямдрах боломжтой.
Манай улс зөвхөн ОХУ-ын нутгаар дамжин гуравдагч улс
руу тээвэрлэлт хийх ганцхан гарцтай байсан бол БНХАУ-ын нутгаар дамжин
гуравдагч улс руу тээвэрлэлт хийх боломж нэмэгдлээ. Цаашид Монгол Улсын нутгаар хийж буй дамжин өнгөрөх тээврийн хэмжээ
ч үлэмж нэмэгдэхийг ЗТХЯ мэдээллээ.
