Улаанбаатар
“Улаанбаатар төмөр зам” ХНН-ийн зарим бүлгийн үнэ тарифыг өөрчлөхийг дэмжив
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. ШӨХТГ-ын хуралдаанаар “Улаанбаатар төмөр зам” ХНН-ийн зарим бүлгийн тээврийн үнэ, “Хялганат” ХХК-ийн үнэ, “Нью Улаанбаатар интернэйшнл эйрпорт” ХХК-ийн зохицуулалтгүй үйлчилгээний үнэ, тарифын өөрчлөлтийг хэлэлцэв.
“УБТЗ” ХНН-ийн дотоодын ачаа, зорчигч тээврийн тарифыг зах зээлийн зарчимд нийцүүлэн,
ашигтай түвшин хүртэл индексжүүлэх үүднээс “УБТЗ” ХНН-ийн дотоодын ачаа
тээврийн 16, зорчигч тээврийн 2 бүлгийн үнэ, тарифын өөрчлөлтийг хянаж,
зөвшөөрөл олгосон байна. Ингэхдээ нефть, нефтийн бүтээгдэхүүний тээвэрлэлтийг
68.3, хүнсний бүтээгдэхүүний тээвэрлэлтийг 138.5, төмрийн биш хүдэр
тээвэрлэлтийг 30, УБТЗ-аас түрээсэлсэн хөдлөх бүрэлдэхүүнээр ачаа тээвэрлэлтийн
тарифыг 30 хувиар нэмэх “УБТЗ” ХНН-ийн саналыг хүчингүй болгож, бусад тээврийн
бүлгийн үнэ, тарифыг нэмэх саналыг хэвээр үлдээлээ. Мөн “Хялганат” ХХК-ийн
дагнасан хэрэглээний салбар замаар ачаа тээвэрлэхэд ашиглах үнэ тарифын өөрчлөлтийг хянаж, зөвшөөрөл олгохоор шийджээ.
Харин “Нью Улаанбаатар интернэйшнл эйрпорт” ХХК-ийн
зохицуулалтгүй үйлчилгээний үнэ, тарифын өөрчлөлтийг дахин нягтлах шаардлагатай
гэж үзэн хүсэлтийг буцаасныг ШӨХТГ
мэдээллээ.
