Улаанбаатар
Цахим мөрийтэй тоглоом зохион байгуулсан 21 иргэнийг илрүүлжээ
ОРОН НУТГИЙН МЭДЭЭ | ХОВД
Ховд /МОНЦАМЭ/. Ховд аймаг дахь Цагдаагийн газраас цахим орчинд мөрийтэй тоглоом зохион байгуулсан 21 иргэнийг илрүүлж, хаяг байршлыг нь тогтоосон байна.
Улмаар холбогдох хууль,
журмын дагуу арга хэмжээ авчээ. Тэдний 9 нь Ховд аймгийн харьяат, 12 иргэн нь өөр аймгийнх байжээ.
Зөрчлийн тухай хуульд зааснаар
олон нийтийн газар ашиг олох зорилгоор шоо, хөзөр, бусад эд зүйл ашиглан үр
дүнг нь урьдчилан төсөөлөх боломжгүй, аз туршиж тоглодог мөрийтэй тоглоом
тоглосон бол зөрчил үйлдэхэд ашигласан эд зүйл, хэрэгсэл, хууль бусаар
олсон хөрөнгө, орлогыг хурааж хүнийг нэг зуун нэгжтэй тэнцэх хэмжээний төгрөгөөр
торгоно.
Мөн Эрүүгийн хуулийн
20.17 дугаар зүйлийн 1 дэх хэсэгт зааснаар “Олон нийтийн газар, эсхүл
мэдээллийн технологи ашиглан ашиг олох зорилгоор шоо, хөзөр, бусад эд зүйл
ашиглан үр дүнг нь урьдчилан төсөөлөх боломжгүй, аз туршиж тоглодог мөрийтэй тоглоом
зохион байгуулсан бол дөрвөн зуун тавин нэгжээс арван дөрвөн мянган нэгжтэй
тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун
хорин цаг хүртэл хугацаагаар нийтэд тустай ажил хийлгэх, эсхүл зургаан сараас
гурван жил хүртэл хугацаагаар зорчих эрхийг хязгаарлах, эсхүл зургаан сараас
гурван жил хүртэл хугацаагаар хорих ял шийтгэнэ” гэж Ховд аймаг дахь
Цагдаагийн газраас анхаарууллаа.
Цаашид иргэд цахим орчинд мөрийтэй тоглоом зохион байгуулах, тоглох зөрчил гаргахгүй байхыг уриалав.
