Дархан сумын ИТХ-ын даргаар Я.Бат-Очирыг сонголоо
ОРОН НУТГИЙН МЭДЭЭ | ДАРХАН-УУЛДархан-Уул /МОНЦАМЭ/. Дархан сумын иргэдийн Төлөөлөгчдийн Хурлын 8 дахь удаагийн сонгуулийн анхдугаар хуралдаан өнөөдөр боллоо.
Хуралдаанд 31 төлөөлөгч бүрэн оролцож 100 хувийн ирцтэйгээр эхлэв. Анхдугаар хуралдаанаар хэлэлцэх эхний
асуудал Төлөөлөгчдийн бүрэн эрхийг зөвшөөрөх тухай байв. Сумын ИТХ-ын
ээлжит сонгуулийн дүнг сумын Сонгуулийн хорооны дарга И.Алтанцэцэг танилцуулж сумын ИТХ-ын 31 Төлөөлөгчийн бүрэн эрхийг 100 хувийн саналаар
зөвшөөрч баталлаа.
Дараагийн хэлэлцэх асуудал нь сумын ИТХ-ын даргыг сонгох тухай
асуудал байв. Монгол Улсын засаг захиргаа, нутаг дэвсгэрийн нэгж түүний
удирдлагын тухай хуульд заасны дагуу олонх болсон МАН-ын бүлгээс сумын ИТХ-ын
даргад Ядамбаярын Бат-Очирын нэрийг дэвшүүлж төлөөлөгчдийн 100 хувийн саналаар
Дархан сумын ИТХ-ын даргаар сонголоо.
Сумын ИТХ-ын даргыг сонгосны дараа
Төлөөлөгчдийн үнэмлэхийг баталгаажуулан шинээр сонгогдсон Төлөөлөгчдөд энгэрийн
тэмдэг, үнэмлэхийг гардуулан өглөө.
Ядамбаярын Бат-Очирын товч
танилцуулга.
1978 онд
төрсөн
2002-2006
онд Техникийн дээд сургуулийг Уул, уурхайн цахилгаан механик мэргэжлээр
2006-2008
онд ШУТИС-ийн Уул, уурхайн инженерийн сургуулийн Уурхайн машин тоног
төхөөрөмжийн ашиглалтын инженер мэргэжлээр тус тус дүүргэжээ.
Ажлын
дадлага туршлага:
2005-2006
онд “Монголросцветмет” ХК-ийн харьяа “Бор-Өндөр”-ийн уулын баяжуулах үйлдвэрт
цахилгаанчин
2006-2010
онд Техникийн дээд сургуульд багш
2010
оноос хойш ШУТИС-ийн Дархан салбарт багшаар ажиллаж байна.
Анхдугаар хуралдааны гуравдугаар
асуудал нь сумын ИТХ-ын Тэргүүлэгчдийн тоог тогтоож батлах тухай байсан. Сумын ИТХ-ын Тэргүүлэгчдээр Я.Бат-Очир, А.Соронзонболд, Б.Оюунчимэг,
Э.Цогзолмаа, Т.Чимгээ, Н.Болор-Эрдэнэ, Б.Ууганбаяр нарыг сонгон
ажиллахаар боллоо.