Узбекистан руу 45 орны иргэд визгүй зорчино

Дэлхийд | Нийгэм
khulan@montsame.gov.mn
2019-01-08 13:57:36

ТАШКЕНТ. /Trend/. Ирэх хоёрдугаар сарын 1-нээс эхлэн 45 орны иргэд Узбекистан руу 30 хоногийн хугацаатайгаар визгүй зорчих эрхтэй болох тухай тус улсын олон нийтийн хэвлэл мэдээллийн хэрэгслүүд мэдээлэв.


Бүгд Найрамдах Узбекистан Улсын аялал жуулчлалын хөгжлийг хурдасгах тухай тогтоолд нэмэлт өөрчлөлт оруулах тухай баримт бичигт тус улсын Ерөнхийлөгч Шавкат Мирзиёев гарын үсэг зурсан байна. Үүнд визийн дэглэм болон Узбекстанд үлдэх дүрмийг хялбаршуулах тухай заажээ.


2017 онд Узбекистаныг сонгон аялсан гадаадын жуулчдын тоо 2.6 сая байсан бол өнгөрсөн онд энэ тоо хоёр дахин нэмэгдэж, 5.3 сая хүрсэнтэй холбогдуулан энэхүү шийдвэрийг гаргасан байна.


Дээрх тогтоолд 2019 оны хоёрдугаар сарын 1-нээс эхлэн Австрали, Австри, Аргентин, Босни ба Герцеговина, Ватикан, Люксембург, Унгар, Бруней, Грек, Ирланд, Исланд, Итали, Канад, Андорра, Лихтенштейн, Монако, Бельги, Дани, Испани, Нидерланд, Норвег, Швед, Латви, Литва, Монгол, Шинэ Зеланд, Португал, Болгар, Кипр, Мальта, Польш, Сан-Марино, Серби, Словени, Хорват, Чили, Румын, Словак, Их Британи, Бразил, Финланд, Монтенегро, Чех, Швейцарын иргэд Узбекистан улс руу 30 хоног визгүй зорчих эрхтэй болох ажээ.


Узбекистаны Засгийн газрын 2018 оны хоёрдугаар сарын шийдвэрээр Израил, Индонез, БНСУ, Малайз, Сингапур, Турк, Япон зэрэг долоон улс, түүний дараа Тажикистан, Франц, Герман зэрэг гурван улсын иргэд тус улс руу визгүй зорчих эрхтэй болж байсан юм. 

Холбоотой мэдээ