Цоохор ирвэсийн тоо толгой цөөрсөөр байна

ДЭЛХИЙН МЭДЭЭ
dorjkhand@montsame.mn
2016-10-21 14:38:42

ЛОНДОН. /ВВС/. Азийн уулархаг бүс нутгуудад жилд хэдэн зуун цоохор ирвэсийг хулгайн анчид хөнөөсөөр байна гэж шинээр гаргасан судалгааны тайланд бичжээ.

Өнөөдөр дэлхийн хэмжээнд ердөө 4000 ирвэс үлдээд байгаа ажээ.

Мэргэжилтнүүдийн хэлснээр, долоо хоногт дунджаар дөрвөн ирвэсийг хөнөөдөг байна. Гол төлөв малыг нь барьж идсэний хариуд нутгийн иргэд ирвэсийг агнадаг ажээ.

Цоохор ирвэсийн арьсыг хуулийн хариуцлагаас зайлсхийн онлайнаар худалдах болсонд түгшиж байгаагаа мэргэжилтнүүд уг тайланд онцлон дурджээ.

Маш ховордсон цоохор ирвэс нь ердөө 12 улсад, тухайлбал, Хятад, Бутан, Балба, Энэтхэг, Пакистан, Монгол, Тажикистан болон Орост амьдардаг байна.

Энэ амьтан далайн түвшнээс дээш 1000-5400 м-ийн өндөрлөг газарт амьдардаг аж.

Дээрх судалгааны тайланд дурдсанаар, 2008 оноос хойш жилд 221-450 цоохор ирвэсийг хууль бусаар агнажээ.

Цоохор ирвэсийг хулгайгаар агнасан тохиолдлуудын 90 гаруй хувь нь Хятад, Монгол, Пакистан, Энэтхэг болон Тажикистанд бүртгэгдсэн байна.

Г.Доржханд

 

 

Холбоотой мэдээ