ПАРИС, 2024 оны арваннэгдүгээр сарын 7 /TASS/. Аваргуудын лигийн ерөнхий шатны дөрөвдүгээр тойргийн тоглолтод Францын “Парис Сен-Жермен” клуб Испанийн “Атлетико Мадрид” багт талбайдаа 1:2-оор хожигдлоо. 

Талбайн эзэн багаас хагас хамгаалагч Уоррен Заир-Эмери тоглолтын 14 дэх минутад гоолдсон бол зочин багаас Науэль Молина (18), Анхель Корреа (90+3) нар гоол оруулжээ. 

Дөрвөн тойргийн дараах байдлаар "ПСЖ" 4 оноо, “Атлетико Мадрид” 6 оноо авлаа. Дараагийн тойрогт Францын баг Германы “Байерн Мюнхен”-тэй, Испанийн баг Чехийн “Спарта” -тай зочлон тоглоно. Хоёр тоглолт 11 дүгээр сарын 26-нд болно.

Лхагва гарагт болсон бусад тоглолтод "Барселона" баг Сербийн “Црвена Звезда” багийг талбайд нь 5:2-оор буулган авчээ. Испанийн тус клуб 702 дахь гоолоо оруулж, Аваргуудын лигийн түүхэнд 700 гоолын босгыг давсан гурав дахь баг болсон байна. Тус тэмцээний түүхэнд хамгийн олон гоолыг "Реал Мадрид" (1 084), “Байерн Мюнхен” (836) багууд оруулж байсан юм. Нидерландын "Фейенорд" баг талбайдаа Австрийн "Зальцбург" багт (1:3) хожигдсон бол Италийн "Интер" талбайдаа Английн “Арсенал" (1:0) багийг хожжээ. Францын “Брест” баг “Спарта”-г (2:1) талбайдаа, Италийн “Аталанта” Германы “Штутгарт”-ыг (2:0) зочлон тоглож хожсон бол Швейцарын “Янг Бойз” баг Украины “Шахтёр”-т (1:2) талбайд нь хожигджээ. Бельгийн “Брюггес” баг Английн “Астон Вилла”-г (1:0), Германы “Байерн” баг Португалын “Бенфика”-г талбайдаа (1:0) тус тус хожсон байна.

Ерөнхий шатны хүснэгтийн нэгдүгээрт дөрвөн тоглолтод бүгдэд нь хожсон Английн “Ливерпүүл” баг (12 оноо) бичигдэж байна. Португалын “Спортинг”, “Монако”, Францын “Брест”, Италийн “Интер” багууд 10 оноо, “Барселона”, Германы “Боруссия” (Дортмунд), “Астон Вилла” багууд 9 оноо, “Аталанта” баг 8 оноог тус тус авчээ. Английн “Манчестер Сити”, Италийн “Ювентус”, “Арсенал”, Германы “Байер Леверкузен”, Францын “Лилль”, Шотландын “Селтик”, Хорватын “Динамо Загреб” багууд 7 оноотой байна.

Энэ удаагийн тэмцээнд хоёр тоглолтод хожоод байгаа “Байерн Мюнхен” баг 6 оноотой 17-р байрт бичигдэж байна. “Реал Мадрид”, “Бенфика”, Италийн “Милан”, “Фейеноорд”, Бельгийн “Брюгге”, “Атлетико” багууд мөн 6 оноотой байгаа бол Нидерландын "ПСВ" 5 оноо, "ПСЖ", "Спарта", "Штутгарт", Шахтёр багууд 4 оноо, Испанийн "Жирона", " Зальцбург" багууд 3 оноо, Италийн "Болонья" 1 оноо  авчээ. Дөрвөн тойргийн дараах байдлаар Германы "Лейпциг", Австрийн "Штурм", "Янг Бойз", "Црвена Звезда", Словакийн "Слован" гэсэн таван баг оноо авч чадаагүй байна. 

2024/25 оны улирлаас эхлэн клубүүд хэсгийн тоглолтын оронд ерөнхий шат гэж нэрлэж буй тоглолтод оролцож байгаа юм. Мөн түүхэндээ анх удаа 36 баг өрсөлдөж байгаа бөгөөд эхний найман баг 1/8 шигшээд шууд шалгарах бол үлдсэн найман байрыг 9-24-р байрт шалгарсан багуудаас шалгаруулна. Тэмцээнд оролцогч баг бүр найман өөр өрсөлдөгчтэй найман тоглолт хийнэ.