Улаанбаатар
Франц улс руу зорчих иргэдэд зөвлөж байна
МОНГОЛЫН МЭДЭЭ | НИЙГЭМ
Улаанбаатар, 2024 оны долоодугаар сарын 29 /МОНЦАМЭ/. “Парис-2024” зуны Олимп энэ сарын 26-ны өдрөөс наймдугаар сарын 11-нд зохион байгуулагдахтай холбогдуулан Бүгд Найрамдах Франц Улсын хилээр нэвтрэх үед зорчигчдын авч орохыг зөвшөөрсөн бараа, бүтээгдэхүүний талаарх мэдээллийг хүргэж байна.
Тухайлбал:
Бэлэн мөнгө: Франц Улс, Европын Холбооны улсад
зорчиж буй зорчигч 10 мянган евро
болон түүнээс дээш хэмжээний бэлэн мөнгө, гадаад валют, үнэт металл /алт,
мөнгө, зоос г.м/, мөнгө болгон хөрвүүлэх боломжтой санхүүгийн хэрэгслүүд /чек,
үнэт цаас г.м/ авч яваа тохиолдолд энэ тухайгаа Франц Улсын гаалийн
байгууллагад бичгээр мэдүүлэх үүрэгтэй. Мэдүүлээгүй
тохиолдолд торгож, мэдүүлээгүй хөрөнгийг хураан авах шийтгэл оногдуулдаг байна.
Эм бэлдмэл: Дээрх улсад зорчихдоо хувийн
хэрэгцээнийхээ шаардлагатай
эм, бэлдмэлийг авч явах боломжтой. Тэдгээр
эм, бэлдмэл нь зориулалтын баглаа, сав боодолтой, холбогдох жор /3 сараас
хэтрээгүй/ мэдээлэлтэй, харах боломжтой байх ёстой. Мансууруулах, сэтгэцэд
нөлөөлөх эм, бэлдмэлийг хориглоно.
Тэжээвэр амьтан: Франц Улс, Европын Холбооны холбогдох хууль журмын
дагуу мал амьтдыг /гэрийн тэжээвэр амьтан/ Францын хилээр нэвтрүүлэхэд ЕХ-ны
баталгаажсан гэрчилгээ бүхий мэргэжлийн мал эмнэлгийн байгууллагын
тодорхойлолт, гэрийн тэжээвэр амьтны үнэмлэх, вакцины гэрчилгээ зайлшгүй
шаардлагатай. Бусад
дэлгэрэнгүй мэдээллийг Франц Улсын гаалийн албаны цахим хуудаснаас авах
боломжтой.
Архи, тамхины хязгаар: Согтууруулах ундаа, тамхи, тамхины төрлийн бүтээгдэхүүнийг
татвараас чөлөөлж, улсын хилээр нэвтрүүлэх дээд хэмжээ: Үүнд:
22 хувиас дээш хэмжээний хатуулагтай этилийн спирт агуулсан
1 литр хүртэлх согтууруулах ундаа;
22 хувиас доош хэмжээний хатуулагтай этилийн спирт агуулсан
2 литр хүртэлх согтууруулах ундаа;
10 ширхэгтэй 1 хайрцаг буюу 200 ширхэг янжуур тамхи;
50 ширхэг навчин тамхи;
250 грамм дүнсэн тамхи;
20 мл электрон тамхины цэнэглэгч;
100 грамм хамрын тамхи зэрэг болохыг ГХЯ мэдээлжээ.
