Орон нутгийн сонгуульд нэр дэвшигчид үнэмлэхээ гардан авлаа
ОРОН НУТГИЙН МЭДЭЭ | ОРХОНИрэх сарын 19-нд болох Орон нутгийн сонгуульд нэр дэвшигчид үнэмлэхээ гардан авлаа. Орхон аймгийн Баян-Өндөр сумын ИТХ-ын сонгууль нь 22 тойрогт 31 мандаттай. Тус сумын ИТХ-ын сонгуульд улс төрийн гурван намаас 73 хүнийг нэр дэвшигчээр бүртгэжээ. Тодруулбал, МАН, АН тус бүрээс 31, МАХН-аас 11 хүн өрсөлдөнө.
Мөн зургаан хүн бие даан нэр дэвшихээр болж үнэмлэхээ гардан авлаа. Орон нутгийн сонгуулийн сурталчилгаа ирэх сарын нэгнээс эхэлнэ. “Сонгуулийн санал хураалт явагдах өдөр Баян-Өндөр сумын хэмжээнд 40 хэсгийн хороо буюу санал авах байр ажиллана” гэж тус сумын Сонгуулийн хорооны дарга ярьлаа.
Жаргалант сумын хувьд ИТХ-ын сонгууль нь 3 тойрогт 21 мандаттайгаар явагдана. Тус сумын Сонгуулийн хороо 44 нэр дэвшигчийн үнэмлэхийг нь гардууллаа. Дээрх 44 хүний 21 нь МАН-аас, 21 нь АН-аас нэр дэвшиж байна. Орхон аймгийн Баян-Өндөр суманд сонгуулийн насны 65 мянга 122 хүн амьдарч байгаа бол Жаргалант суманд 2718 хүн амьдардаг юм. Мөн хоёр сумын Сонгуулийн хороо тус бүр 9 хүний бүрэлдэхүүнтэй ажиллаж байна.
Б.Оюун-Эрдэнэ