Улаанбаатар
ХОВД: "Стандарт ба хөгжил” хөтөлбөрийн хэлэлцүүлэгт 80 гаруй хүн оролцлоо
ОРОН НУТГИЙН МЭДЭЭ | ХОВД
Жаргалант /МОНЦАМЭ/. ”Стандарт
ба хөгжил” үндэсний хөтөлбөрийн санал авах хэлэлцүүлэг өнөөдөр Ховд аймагт
боллоо.
Хэлэлцүүлэгт
төрийн болон төрийн бус байгууллага, хувийн хэвшлийн аж ахуйн нэгжийн төлөөлөл
80 гаруй хүн оролцов.
Энэ
үеэр "Стандартчилал техникийн зохицуулалт, тохирлын үнэлгээний
итгэмжлэлийн тухай" хуулинд оруулж буй өөрчлөлтийн төсөл болон "Стандарт
ба хөгжил" үндэсний хөтөлбөрийн төслийн талаар мэргэжилтнүүд танилцуулж, хөтөлбөрийн ач холбогдол, үр нөлөө, анхаарах
асуудлын тухай санал солилцлоо.
“Төрөөс стандарт, хэмжил зүйн талаар баримтлах
бодлого”, “Стандарт ба хөгжил” үндэсний хөтөлбөрийг боловсруулах үүрэг, чиглэлийг
Стандарт, хэмжил зүйн газар хариуцан ажиллаж байгаа бөгөөд Монгол Улсын
хөгжлийн бодлого, төлөвлөлтийн баримт бичгүүдтэй уялдуулах, тэргүүлэх чиглэлийг эрэмбэлэх, үр дүнтэй хэрэгжүүлэхэд төрийн болон төрийн
бус байгууллага, аж ахуйн нэгж, иргэдийн тэгш оролцоог хангахыг чухалчилж буй.
Үндэсний чанарын дэд бүтцийн эрх зүйн орчныг цаашид олон улсын жишигт хүргэж боловсронгуй болгох замаар бүтээгдэхүүн, үйлчилгээний чанар аюулгүй байдлыг хангаж эдийн засгийн өрсөлдөх чадварыг дээшлүүлэх зорилтын дагуу дээрх хөтөлбөрийг 2023-2032 онд хэрэгжүүлэхээр төлөвлөжээ.
