Улаанбаатар
Тавантолгой-Зүүнбаян чиглэлийн төмөр замаар шатахуун тээвэрлэлтийг эхлүүлнэ
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. “Монголын төмөр зам” ТӨХК Монголын газрын тосны бүтээгдэхүүн импортлогчдын мэргэжлийн холбоотой хамтран ажиллах санамж бичиг байгууллаа.
Стратегийн томоохон орд газруудад үйл ажиллагаа явуулж буй аж ахуйн нэгж байгууллага, бүс нутгийг хямд өртөг бүхий шатахуунаар хангах зорилгоор байгуулж буй тус санамж бичигт “Монголын төмөр зам” ТӨХК-ийн Гүйцэтгэх захирал П.Ганхүү, Монголын газрын тосны импортлогчдын мэргэжлийн холбооны Гүйцэтгэх захирал Л.Ганболд, мэргэжлийн холбоог төлөөлж “Шунхлай” ХХК-ийн Гүйцэтгэх захирал Ж.Мөнхнаран, “Сод Монгол” ХХК-ийн Дэд захирал Н.Гансүх, “Петровис ойл” ХХК-ийн үйл ажиллагаа хариуцсан захирал Н.Насанжаргал гарын үсэг зурав.
Тус санамж бичгийн хүрээнд төмөр замын тээврийн тасралтгүй найдвартай байдлыг хангаж, шатахуун тээвэрлэхтэй холбоотой хөрсний бохирдлыг багасгах, байгаль орчинд үүсэж болох сөрөг нөлөөллийг бууруулах, төмөр замын тээвэр, логистикийн тогтолцоог хөгжүүлэх чиглэлээр хамтран ажиллахыг ЗТХЯ мэдээллээ.
