Улаанбаатар
Түүх, соёлын долоон газрыг нэмэлтээр хамгаалалтад авна
ОРОН НУТГИЙН МЭДЭЭ | ДАРХАН-УУЛДархан-Уул аймгийн Засаг даргын зөвлөлийн хурлаар Нийтийн аж ахуйн, үйлчилгээний газрын бүтэц, зохион байгуулалтыг шинэчлэх тухай, Дархан-Уул аймгийн нутаг дэвсгэр дахь түүх соёлын үл хөдлөх дурсгалыг нэмэлтээр хадгалалт, хамгаалалтад оруулах тухай, Захирагчийн албаны дүрэм, бүтэц орон тоог шинэчлэн батлах, аймгийн Засаг даргын нөөц хөрөнгийн зарцуулалтын асуудлыг хэлэлцэж шийдвэр гаргав.
Мөн 2016-2017 оны өвөлжилтийн бэлтгэл ажлыг хангуулах ажлын хэсгийн даргаар аймгийн Засаг даргын Үйлдвэрлэл, дэд бүтэц, хууль эрх зүйн асуудал хариуцсан орлогч Т.Ганболд ажиллах бол нарийн бичгийн даргаар Захирагчийн албаны дарга гишүүдээр ХБХ, НХХ, СТСХ, Шарын гол, Хонгор, Орхон, Дархан сумын Засаг дарга, ОБГ, ХХААГ, БСГ, НААҮГ, “ДДЦС” ТӨХК, “ДДС” ТӨХК, “Дархан-Ус суваг” ТӨХК, “ДСЦТС” ХХК-ийн удирдлагууд багтжээ. Хотынхоо өнгө үзэмжийг сайжруулахад хамгийн их үүрэг гүйцэтгэдэг НААҮГ-ын бүтэц зохион байгуулалтад өөрчлөлт хийхээр болж конторт сууж ажиллах алба хаагчдын тоог багасгаж үүний оронд зам талбай, ногоон байгууламжийг цэвэрлэх, хамгаалах, арчлах үйлчилгээний ажилчдын тоог 11-ээр нэмэгдүүлэхээр тогтов. Түүнчлэн аймгийн нутаг дэвсгэр дэх түүх соёлын долоон газрыг нэмэлтээр хамгаалалтад авах асуудлыг аймгийн ИТХ-ын Тэргүүлэгчдийн хурлаар оруулахаар боллоо. Хамгаалалтад авах түүх соёлын газруудад Адуунчулуун уулын суваргатай хад, мөн уулын өврийн бичээс, Суваргатай хад, бичээс бүхий хад, Шарын гол сумын буган чулуун хөшөөд, Орхон сумын Баян-Уулын булш, хиргисүүр, Шарын гол сумын Баянзүрх уулын булш, хиргисүүр, Дархан сумын Оршуулгын газрын хиргисүүрүүд багтсан байна. Аймгийн төр захиргааны байгууллагын бодлого шийдвэр, нийгэм, эдийн засгийн зорилтыг хэрэгжүүлж иргэдийнхээ эрэлт хэрэгцээ, хүсэл сонирхлыг бүх талаар хангахад төрийн шуурхай үйлчилгээ үзүүлэх үүрэг бүхий Захирагчийн албаны даргын түр орлон гүйцэтгэгчээр Э.Равжаадэлгэрэх томилогдож албаныхаа дүрэм, бүтэц орон тоог шинэчлэн батлуулахаар боллоо.
Б.Норовсамбуу
