ДЭМБ сармагчны цэцэг өвчний тандалт судалгааг өргөжүүлж байна

Монголын мэдээ | Эрүүл мэнд
batbold.sh@montsame.gov.mn
2022-05-22 11:13:02
@ShoovdorBatbold

Улаанбаатар /МОНЦАМЭ/. Эрүүл мэндийн яамнаас дэлхийн олон оронд тархаж байгаа сармагчны цэцэг өвчний талаар ДЭМБ-ын мэдээллийг иш татан мэдээлжээ.


Уг мэдээлэлд, сармагчны цэцэг өвчин нь Poxviridae овгийн Orthopoxvirus төрөлд багтдаг сармагчингийн вирусээр үүсгэгддэг. Ихэвчлэн Төв болон Баруун Африкийн халуун орны ширэнгэн ойд тархдаг зоонозын өвчин. Ихэвчлэн халуурах, тууралт гарах, тунгалгийн зангилаа томрох зэрэг эмнэлзүйн шинж тэмдэг илэрч, 2-4 долоо хоног үргэлжилдэг, нас баралтын хувь 3-6 байна. Сармагчны цэцэг өвчин нь өвчтэй хүн, амьтантай ойр харьцах үед дуслаар эсвэл вирусээр бохирдсон эд зүйлсээр дамжин халдварладаг.


Сармагчны цэцэг өвчин нь нутагшмал тархалттай орноос гадна Их Британи Умард Ирландын Нэгдсэн Хаант Улс, АНУ, Канад, Испани, Португал, Швед, Итали зэрэг эндемик бус 11 оронд бүртгэгдээд байна. Дэлхийн Эрүүл Мэндийн Байгууллага (ДЭМБ) судлаачидтай хамтран нөхцөл байдлыг үнэлж, тандалт судалгааг өргөжүүлэх, улс орнуудад заавар зөвлөгөө өгөхөөр ажиллаж байна.

 

Одоогоор лабораториор батлагдсан 80 орчим тохиолдол байгаа ба 50 тохиолдлыг судалж байна. Тандалт судалгаа өргөжихийн хэрээр илүү олон тохиолдол бүртгэгдэх төлөвтэй байна.

 

ДЭМБ өртсөн улс орнууд болон бусад улстай хамтран ажиллаж, өртөж болзошгүй хүмүүсийг олж, илрүүлэх, тандалт хэрхэн өргөжүүлэх, хариу арга хэмжээ авах талаар зааварчилгаа өгөхөөр ажиллаж байна. 

 

Өвчний улмаас бүлэг хүмүүсийг гутаан доромжлохыг хэзээ ч хүлээн зөвшөөрөхгүй бөгөөд эдгээр хүмүүс тусламж хүсэхээс татгалзаж, халдварыг нуун дарагдуулах нь дэгдэлтийг зогсооход саад учруулж болзошгүй юм гэж ДЭМБ-аас мэдээлж байна гэжээ. 

Эх сурвалж: ЭМЯ

Холбоотой мэдээ