Б.Мөнхжин: Олон улсын худалдааг ил тод болгох шаардлагатай байна

Монголын мэдээ | ГХЯ-ны мэдээ
ariunbold@montsame.mn
2021-12-06 16:17:15

Улаанбаатар /МОНЦАМЭ/. Гадаад харилцааны дэд сайд Б.Мөнхжин Европын аюулгүй байдал, хамтын ажиллагааны байгууллага (ЕАБХАБ)-ын Гадаад хэргийн сайд нарын 28 дугаар уулзалтад оролцох үеэрээ тус байгууллагын 2021 оны Дарга улс-Шведийн Гадаад хэргийн сайд Анн Линдэтэй уулзав.


Дэд сайд Б.Мөнхжин ЕАБХАБ-ын Гадаад хэргийн сайд нарын ээлжит уулзалтыг амжилттай зохион байгуулж буйд баяр хүргэж, Гадаад харилцааны сайд Б.Батцэцэгийн мэндчилгээг уламжлав.


Уулзалтын үеэр Дэд сайд Б.Мөнхжин Монгол-Шведийн харилцааг өргөжүүлэх үүднээс худалдаа, хөрөнгө оруулалтыг нэмэхийн төлөө хоёр тал идэвхтэй хамтран ажиллах нь чухал гэдгийг онцоллоо. Мөн цар тахлын үед үүссэн нөхцөл байдал нь олон улсын худалдааг илүү шударга, ил тод болгох шаардлагатайг харуулж байна гэв. Хоёр тал цаашид нийтлэг үнэт зүйлдээ тулгуурлан ардчилал, хүний эрхийг бэхжүүлэх чиглэлд хамтран ажиллах өргөн боломж байгааг дурдлаа.


Шведийн Гадаад хэргийн сайд Анн Линдэ Монгол-Шведийн харилцаа, хамтын ажиллагаа амжилттай хөгжиж байгааг тэмдэглээд цаашид хоёр талын худалдааг нэмэгдүүлэх төлөө хамтран ажиллахаа илэрхийлэв. Тэрбээр талууд “Ардчиллыг хамгаалах анд нөхөд”-ийн хүрээнд идэвхтэй хамтарч ажиллаж байгааг дурдаад, цаашид “Ардчиллын төлөөх тэмүүлэл” санаачилгын хүрээнд хамтран ажиллах боломжтойг тэмдэглэв.

Холбоотой мэдээ