Анхны урлагийн төрөлжсөн сургалттай анги нээлээ
ОРОН НУТГИЙН МЭДЭЭ | ДУНДГОВЬДундговь /МОНЦАМЭ/. Дундговь аймгийн “Тэнгэрийн тэмдэг” хүүхдийн театр, Сайнцагаан
сумын Хүмүүнлэг сургуультай хамтран тус аймагт анхны урлагийн төрөлжсөн
сургалттай анги нээлээ.
Урлагийн бүхий л салбарт чадварлаг мэргэжилтнийг бэлтгэх
зорилго бүхий урлагийн төрөлжсөн сургалттай ийм анги нээх санаачилгыг аймгийн
ИТХ-ын дарга С.Од-Эрдэнэ нь гарган хэрэгжүүлж байгаа аж.
Төрөлжсөн анги нээхийн тулд урлагаар хичээллэх
сонирхолтой сурагчдын эцэг эхтэй уулзалт хийн, зөвлөлдсөний үндсэн дээр 11
настнуудыг сонгон суралцуулахаар болсон бөгөөд Хүмүүнлэг сургуулийн 6-ийн Б бүлгийг 29
сурагчтайгаар шинээр байгууллаа.
Урлагийн төрөлжсөн ангийн сурагчид дуу, хөгжим, драм,
бүжиг гэх мэт урлагийн бүхий л төрлийн суурь боловсролыг эзэмших бөгөөд мөн
ерөнхий эрдмийн хичээлээ үзнэ.
Урлагийн залуу хойч үеийг бэлтгэхэд ”Тэнгэрийн тэмдэг”
хүүхдийн театрын багш нар ажиллах ажээ.