Улаанбаатар
Өмнөд Суданд үүрэг гүйцэтгэж буй энхийг сахиулагчид шилдгүүдээ шалгаруулав
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Бүгд Найрамдах Өмнөд Судан Улсад үүрэг гүйцэтгэж буй хурандаа Д.Энхбаатар захирагчтай Монгол Улсын Зэвсэгт хүчний 10 дугаар ээлжийн цэргийн багийн бие бүрэлдэхүүн 4 дүгээр сард гүйцэтгэсэн ажлаа дүгнэжээ.
НҮБ-ын UNMISS энхийг дэмжих ажиллагаанд үүрэг гүйцэтгэж буй Монголын цэргийн багаас тухайн сард бүтээлч хандлагаараа хамт олноо манлайлж, цэргийн алба, үүрэг гүйцэтгэлт, сахилга зохион байгуулалтаар бусдаасаа шалгарсан бүрэлдэхүүнээ “Тэргүүний салаа”, “Тэргүүний тасаг”, “Тэргүүний офицер”, “Тэргүүний ахлагч”, “Тэргүүний шинийг санаачлагч бүтээлч алба хаагч” хэмээн өргөмжилж, шагнаж урамшуулдаг уламжлалтай.
Дөрөвдүгээр сарын “Тэргүүний салаа”-гаар дэслэгч З.Багахүү захирагчтай гуравдугаар мотобуудлагын салаа, “Тэргүүний тасаг”-аар ахлах ахлагч Э.Эрдэнэбаатар захирагчтай гуравдугаар мотобуудлагын тасаг, “Тэргүүний офицер”-оор дотрын их эмч, ахлах дэслэгч Б.Баярбат, “Тэргүүний ахлагч”-аар чирэгчийн жолооч, дэд ахлагч Ц.Цэрэнтогтох, “Тэргүүний шинийг санаачлагч, бүтээлч алба хаагч”-аар буудагч, дэд ахлагч Г.Бат-Эрдэнэ нар тус тус шалгарчээ.
