Улаанбаатар
Өмнөд Судан "Рио-2016"-д 10 гаруй тамирчнаа илгээхээр төлөвлөж байна
ДЭЛХИЙН МЭДЭЭНАЙРОБИ. /Xinhua/. Өмнөд Судан улс “Рио-2016” Олимпын наадамд 10-аас илүү тооны тамирчин оролцуулахаар төлөвлөж байна гэж тус улсын Олимпын хорооны ерөнхийлөгч, дэслэгч генерал Уилсон Дэн Куоирот мэдэгдэв.
Энэ сарын 22-28-нд ӨАБНУ-д болох хөнгөн атлетикийн Африк тивийн аварга шалгаруулах тэмцээнд Өмнөд Суданы 14 тамирчин оролцоно гэдгийг тэрбээр мэдэгджээ.
"Бидэнд яг одоо 63 хоногийн хугацаа үлдээд байна. Бид аль болох яаралтай бэлтгэлээ хангах хэрэгтэй. Өмнөд Судан хөнгөн атлетикийн төрөлд оролцоно. Гэхдээ хүссэн хүн болгон оролцож чадахгүй, Олимпод оролцоход тодорхой шалгуур байдаг. Тиймээс Африкийн Холбоо тэмцээнийг Өмнөд Африкийн Дурбан хотод зохион байгуулж байгаа юм" гэж тэрбээр ярилаа.
Мөн тэрбээр хэлэхдээ "эмэгтэй тамирчид 100 метрийн гүйлтэд 11.32 секундийн амжилт, эрэгтэй тамирчид 10.16 секундийн амжилт үзүүлсэн тохиолдолд Олимпод оролцох эрхтэй болно. Ийм үзүүлэлтэд хүрэхийн тулд манай тамирчид шаргуу хөдөлмөрлөх хэрэгтэй болж байна" гэлээ.
2012 оны Зуны Олимпын наадамд улсынхаа нэр дээр бус харин өөрийн нэрээр оролцож байсан тус улсын тамирчин Гуор Мариал болон 2014 оны Залуучуудын зуны олимпт бие даан оролцож байсан Румат Румар нар "Рио-2016" наадамд оролцох эрхээ авчээ.
Манай 14 тамирчин дээрх шалгуурт тэнцэж чадахгүй бол Олимпт оролцох эрхээ авсан хоёр тамирчин маань Рио-Де-Жанейро хотыг зорино гэж Өмнөд Суданы Олимпын хорооны дарга хэллээ.
Д.Нямтулга
