Улаанбаатар
Зургаан дүүргийн 10 мянган өрхөд сайжруулсан түлш тараана
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Нийслэлийн зургаан дүүрэгт сайжруулсан түлш шаардлагатай 10 мянган өрхөд шахмал түлш тарааж байна.
Өнөөдөр 6 дүүргийн 31 хорооны 1760 өрхөд сайжруулсан түлш тарааж, нэг өрхөд 2 сарын хэрэглээ буюу 933 кг -ыг олгов.
Бүх нийтийн бэлэн байдлын зэрэгт шилжсэн, хүйтний эрч чангарч буй энэ өдрүүдэд Хан-Уул, Сонгинохайрхан, Чингэлтэй дүүргийн зорилтот бүлгийн 1211 өрхөд түлш тараалаа.
Энэ ажлыг ХНХЯ, НЗДТГ, Нийслэлийн Нийгмийн халамжийн газар, “Таван толгой түлш” ХХК-тай хамтран үе шаттай зохион байгуулж байгаа. Сайжруулсан түлшийг “Таван толгой түлш” ХХК-ны 10 агуулахаас халдвар хамгааллын дэглэм баримтлан тараав.
Одоогоор Нийслэлийн зургаан дүүргийн шахмал түлш борлуулах 73 цэгт, 591.5тн түлшний нөөцтэй байна.
