Хөдөлмөрийн аюулгүй байдлын тухай хуулийн мэдлэгээр өрсөлдөж таван сая төгрөгөөр шагнуулжээ

ОРОН НУТГИЙН МЭДЭЭ | ОРХОН
orkhon@montsame.mn
2019-11-06 14:44:16
oyuka_hu@yahoo.com

Орхон /МОНЦАМЭ/ Хөдөлмөрийн аюулгүй байдал, эрүүл ахуйн /ХАБЭА/ хууль, дүрэм, журмыг урлагаар дамжуулан ажилчдад хүргэдэг “SAFETY FIRST” 17 дахь удаагийн тэмцээн амжилттай боллоо.

ХАБ-ын манлайлал, ажилтны оролцоо сэдвээр хоёр үе шаттай болсон уг тэмцээнд Эрдэнэт үйлдвэрийн бүтцийн нэгжүүдийн 20 баг мэдлэг, ур чадвараа сорин өрсөлдсөнөөс Авто тээврийн цех шилдгээр шалгарч, шилжин явах цом, өргөмжлөл, таван сая төгрөгөөр шагнуулав.

Дэд байрт Дулааны цахилгаан станцын “Галын бурхад” баг тодорч, өргөмжлөл, гурван сая төгрөг, гутгаар байрыг Цахилгаан цех эзэлж өргөмжлөл, 1,5 сая төгрөгийн шагнал хүртсэн юм. Харин тусгай байрт Холбоо, мэдээллийн технологи, автоматжуулалтын цех, Ил уурхайн багууд шалгарч өргөмжлөл, 800 мянган төгрөгийн урамшуулал хүртлээ.

ХАБЭА-н хэлтэс, Соёл, урлагийн цогцолбор хамтран зохион байгуулсан “SAFETY FIRST-2019” тэмцээн нь залуу ажилчдад чиглэсэн, ХАБЭА-н дүрэм, журмын 2019 онд шинэчилсэн өөрчлөлтийг тусгасан, ХАБ-ыг монгол зан үйлтэй уялдуулснаараа онцлогтой гэж мэргэжилтнүүд үзэж байна. “Гала” тоглолтын үеэр шилдэг номинацийн эзэд тодорсон юм. “ХАБЭА-н шилдэг инженер”-ээр Барилга засварын цехийн С.Баярсайхан, “Шилдэг арга зүйч”-ээр Оёдлын цехийн А.Мөнхзаяа, “Шилдэг удирдлагын манлайлал” номинацийн эзнээр Цахилгаан цехийн дарга Д.Даваадорж нар шалгарч шагнал гардлаа. Энэ удаагийн тэмцээнд 100 ажилтан оролцож, давхардсан тоогоор 5000 орчим үзэгчдэд ХАБЭА-н мэдлэг, мэдээлэл түгээсэн байна.

 

Холбоотой мэдээ