“Эрүүл шүд-Эрүүл хүүхэд” аянд Орхон аймагт 2800 хүүхэд хамрагджээ
ОРОН НУТГИЙН МЭДЭЭ | ОРХОНОрхон /МОНЦАМЭ/ Монгол Улсын Засгийн газраас хэрэгжүүлж буй “Эрүүл шүд-Эрүүл хүүхэд” аяны хүрээнд Орхон аймагт 2800 хүүхэд үзлэгт хамрагджээ. Энэ нь нийт үзүүлэх ёстой 2-6 насны 10200 хүүхдийн 27 хувь нь л юм.
Үзлэгийн үеэр нийт хүүхдийн 86 хувь нь
шүдний цооролттой, эмчлэх зайлшгүй шаардлагатай гэж гарсан бөгөөд дунджаар нэг
хүүхдийн 6-8 шүд цооролттой байжээ. Иймд хүүхэд бүрт 60 мянган төгрөгийн
эмчилгээ хийсэн байна. Цаашид үзүүлж чадаагүй олон хүүхэд байгаа ч ЭМЯ-наас
олгодог санхүүжилт нь дууссан тул эмчилгээ хийж байсан таван эмнэлэг хүүхдүүдэд
төлбөртэй үйлчилж эхэлжээ. Мөн хүүхдээ
үзүүлэх эцэг, эхийн тоо ч буурсан байна.
Иймд Засгийн газраас хэрэгжүүлж буй дээрх хөтөлбөрийг үргэлжлүүлж санхүүжилтыг
нэмэхийг шүдний эмч нар болон иргэд аймгийн Эрүүл мэндийн байгууллагаас хүсчээ.