Байгаль орчныхон шинэ унаатай боллоо

Монголын мэдээ | Байгаль орчин
192@montsame.mn
2019-09-05 17:40:15

Улаанбаатар /МОНЦАМЭ/. БОАЖЯ харьяа газруудынхаа автомашины паркийг шинэчиллээ.

Тус яамнаас Цаг уур орчны шинжилгээний газар, 21 аймгийн Цаг уур, орчны шинжилгээний төв, холын аймгуудын тусгай хамгаалалттай газрын захиргаа, ЦЕГ-ын Мөрдөн байцаах албаны Хүрээлэн буй орчны эрүүгийн гэмт хэргийг мөрдөн шалгах хэлтэст “Mitsubishi L200” загварын автомашинуудыг парк шинэчлэлийн хүрээнд өнөөдөр олголоо.

БОАЖ-ын сайд Н.Цэрэнбат, “Өнөөдөр хийж буй автомашины парк шинэчлэл нь цаг уурчид болон байгаль хамгаалагчид, байгалийн гэмт хэргийг мөрдөн шалгах ажлын нөхцөлийг сайжруулахад ихээхэн дэмжлэг болно гэж найдаж буй”-гаа илэрхийлээд цаашид байгаль хамгаалагчид болон харьяа байгууллагынхаа ажилтнуудын нийгмийн талыг шийдэхэд анхаарна гэдгээ мэдэгдлээ.


Алслагдсан аймгуудаас энэ удаа Говийн бага дархан цаазат газар (ДЦГ)-ын хамгаалалтын захиргаа, Нөмрөгийн ДЦГ-ын хамгаалалтын захиргаа, Их газрын чулууны байгалийн цогцолборт газар (БЦГ)-ын хамгаалалтын захиргаа, Дарьгангын БЦГ-ын хамгаалалтын захиргаа, Их Богдын БЦГ-ын хамгаалалтын захиргаа, Хан Хөхий нурууны Улсын тусгай хамгаалалттай газар (УТХГ)-уудын хамгаалалтын захиргааны хамт олон шинэ машин хүлээж авсан юм.

Холбоотой мэдээ