Улаанбаатар /МОНЦАМЭ/. Ард түмний амгалан тайван байдлыг сахиулж байдаг, Цагдаа, дотоодын цэргийн байгууллагын хэмжээнд 2018 онд өрнөсөн онцлог 10 үйл явдлыг тоймлон хүргэж байна.

Зарим нэгжийн бүтэц, зохион байгуулалтыг өөрчлөв

ХЗДХ-ийн сайдын энэ оны А/159 дүгээр тушаалаар, Замын цагдаагийн алба, Төмөр зам дахь цагдаагийн газар, Иргэний агаарын тээвэр дэх цагдаагийн хэлтсийг нэгтгэн ТЦА, Мэдээлэл нэгтгэн боловсруулах газар, Мэдээллийн технологи, холбооны төв, Мэдээлэл, шуурхай удирдлагын төв, Шуурхай удирдлага, ажиллагааны хэлтсийг нэгтгэн “Мэдээлэл, дүн шинжилгээ, шуурхай удирдлагын алба”-ыг тус тус байгуулав.

Хар тамхитай тэмцэх газрыг цагдаагийн төв байгууллагын бүтцэд харьяалуулж, Соён гэгээрүүлэх, албаны сургалтын тасгийг “Хэлтэс”, Нийтийн хэв журам хамгаалах, олон нийтийн аюулгүй байдлыг хангах албанд зөрчил шалган шийдвэрлэх хэлтэс, нутаг дэвсгэр хариуцсан цагдаагийн байгууллагад Шуурхай удирдлагын тасгийг байгуулж, хар тамхи, кибер гэмт хэрэгтэй тэмцэх хэлтсийг мэдээллийн технологи IT-ийн чиглэлээр мэргэшсэн хүний нөөцөөр бэхжүүллээ.

Дотоодын цэрэгт тусгай салбарыг байгууллаа

Террорист үйлдлийг таслан зогсоох тусгай ажиллагаанд оролцох, цагдаагийн байгууллагаас үндсэн чиг үүргээ хэрэгжүүлэх явцад нэмэлт хүч, тусгай тактик хэрэглэх шаардлагатай онцгой нөхцөл байдал бий болсон үед дэмжлэг үзүүлэх чиг үүрэг бүхий “Дотоодын цэргийн 809 дүгээр тусгай салбар”-ыг шинээр байгуулав.

Мөрдөн байцаах алба шинэ байртай боллоо

Улсын төсвийн 2018 оны хөрөнгө оруулалтаар 9 давхар, 6809 м.кв талбай, бүхий насанд хүрээгүй хүүхэд, эмэгтэйчүүд, сэжигтэн яллагдагчаас мэдүүлэг авах, эд мөрийн баримт болон хураагдсан эд зүйлсийг хадгалах стандартын шаардлага хангасан өрөө, тасалгаатай Мөрдөн байцаах албаны конторын барилгыг ашиглалтад хүлээн авлаа.

Хууль зүй, дотоод хэргийн сайд багцаасаа 970.0 сая төгрөгийн өртөг бүхий тавилга, техник, тоног төхөөрөмжийн зардлыг шийдвэрлэж өгөв.

Орон нутгийн замын хөдөлгөөнийг хянах 27 пост барилаа

Замын хөдөлгөөний аюулгүй байдлыг хангах, зам тээврийн осол, гэмт хэрэг, зөрчлөөс урьдчилан сэргийлэх, олон улсын болон улсын чанартай авто замыг байнгын хяналтад авах зорилгоор 17 аймгийн 25 сум, нийслэлийн 2 дүүрэгт замын хөдөлгөөний хяналтын постын барилгыг ашиглалтад оруулж, “TPCAM-H10” маркийн хурд хэмжигч, “Драгер 7510” маркийн согтуурлын зэрэг тогтоогч багаж хэрэгслүүдийг олгож, компьютер, ширээ сандал, амралтын өрөөний тавилга хэрэгслээр хангаж, алба хаагчдын ажиллах нөхцөл боломжийг бүрдүүлэв.  

Дээрх хяналтын постыг ажиллуулснаар орон нутгийн замд согтуугаар тээврийн хэрэгсэл жолоодох, хурд хэтрүүлэх зэрэг зам тээврийн осол, зөрчлөөс урьдчилан сэргийлэхэд тодорхой ахиц гаргахын зэрэгцээ хулгайн мал, мах, түүхий эд, хориотой ан агнуурын гаралтай бүтээгдэхүүн тээвэрлэх, хүрээлэн буй орчны эсрэг гэмт хэрэгтэй тэмцэхэд ихээхэн ач холбогдолтой бүтээн байгуулалт болсон юм.

“Хүүхэд хамгааллын өнөөгийн байдал, тулгамдаж байгаа асуудал ба шийдэл” сэдэвт хэлэлцүүлэг

Хүүхэд үйлдсэн, хүүхэд хохирсон гэмт хэргийг бууруулах, тэднийг хүчирхийллээс хамгаалах, урьдчилан сэргийлэх талаар иргэдийн эрх зүйн мэдлэгийг дээшлүүлэх зорилгоор Монгол Улсын Ерөнхийлөгчийн Тамгын газар, Улсын Их Хурлын Нийгмийн бодлого, боловсрол, соёл, шинжлэх ухааны байнгын хороо, Хөдөлмөр, нийгмийн хамгааллын яамтай хамтран энэ оны 04, 12 дугаар саруудад “Хүүхэд хамгааллын өнөөгийн байдал, тулгамдаж байгаа асуудал ба шийдэл” сэдэвт хэлэлцүүлэг, “Хүүхэд хамгаалал” арга хэмжээг зохион байгууллаа.

Ингэснээр насанд хүрээгүй хүмүүсээс үйлдсэн гэмт хэрэг улсын хэмжээнд 26.1, нийслэлд 30.1 хувиар буурсан эерэг үзүүлэлттэй байна.

“Мөнгө угаах гэмт хэрэгтэй тэмцэх асуудал” сэдэвт Олон улсын эрдэм шинжилгээний хурал зохион байгуулав

“Мөнгө угаах болон терроризмыг санхүүжүүлэхтэй тэмцэх үндэсний хөтөлбөр”, “Ази, Номхон далайн бүсийн мөнгө угаахтай тэмцэх бүлгээс өгсөн зөвлөмжийг хэрэгжүүлэх төлөвлөгөө”-ний хүрээнд энэ төрлийн гэмт хэргээс урьдчилан сэргийлэх ажилд иргэний нийгмийн байгууллага, иргэдийн оролцоог өрнүүлэх, бусад орны туршлагыг судлах зорилгоор Монгол Улсын Ерөнхий сайдын ивээлд “Мөнгө угаах гэмт хэрэгтэй тэмцэх асуудал” олон улсын эрдэм шинжилгээний хурлыг энэ оны 10 дугаар сарын 30-ны өдөр зохион байгуулж, гадаад, дотоодын 60 гаруй байгууллагын 400 орчим төлөөлөл, эрдэмтэн, судлаачид оролцож, хурлаас 4 бүлэг, 19 заалт бүхий “Зөвлөмж” гаргалаа.

“Хүний амь нас хохирсон хэргийн нөхцөл байдал, урьдчилан сэргийлэх арга зам, байгууллагуудын хамтын ажиллагааг сайжруулах нь” сэдэвт хэлэлцүүлэг

Монгол Улсын Ерөнхийлөгчийн ивээл дор энэ оны 12 дугаар сарын 18-ны өдөр “Хүний амь нас хохирсон хэргийн нөхцөл байдал, урьдчилан сэргийлэх арга зам, байгууллагуудын хамтын ажиллагааг сайжруулах нь” сэдэвт хэлэлцүүлэг зохион байгуулж, төрийн болон төрийн бус 28 байгууллагын 759 ажилтан, алба хаагч оролцов.

Хэлэлцүүлгээс Монгол Улсын Ерөнхийлөгч “Хүний амь нас хохирч буй гэмт хэргээс урьдчилан сэргийлэх, байгууллагуудын хамтын ажиллагааг сайжруулах тухай” зарлиг баталж,  Засгийн газарт хэрэгжүүлэх чиглэл өгөв.

“UNFRIEND” хөдөлгөөн

Цахим орчинд үйлдэгдэж буй гэмт хэрэг, зөрчил, бусад эрсдэлт хүчин зүйлсээс өсвөр насны хүүхэд багачуудыг урьдчилан сэргийлэх, хамгаалах, иргэдийн цахим орчинг зохистой хэрэглэх эрх зүйн мэдлэгийг дээшлүүлэх зорилгоор “UNFRIEND хөдөлгөөн”-ийг зохион байгуулсан нь төр засаг, олон нийтийн талархлыг хүлээсэн.

Дээрх арга хэмжээний хүрээнд фэйсбүүк дэх садар самууныг сурталчилсан болон зохисгүй агуулга бүхий групп, нүүр хуудсуудыг хэсэгчлэн болон бүхэлд нь устгуулах зорилго бүхий “Хар жагсаалт” бүлгийг үүсгэж, нийт 19.300 гишүүн тус үйл ажиллагааг дэмжин идэвхтэй оролцож байна.

“Камержуулалт-2” болзолт уралдаан зохион байгуулав

Иргэд, аж ахуйн нэгж байгууллагын оролцоотой гэмт хэрэг, зөрчлөөс урьдчилан сэргийлэх зорилгоор, нийслэлийн хэмжээнд хоёр сарын хугацаатай, 60.0 сая төгрөгийн шагналын сантай “Камержуулалт-2” болзолт уралдааныг зарлан, 106 хороо, 644 аж ахуйн нэгж, байгууллага, 145 сууц өмчлөгчдийн холбоо, 26 хөршийн хяналтын бүлэг, 367 иргэнд мэргэжил арга зүйн зөвлөгөө өгч, 28787 иргэн, аж ахуйн нэгж, байгууллагыг хамруулан, гэмт хэрэг, зөрчил ихээр үйлдэгддэг болон үйлдэгдэж болзошгүй эмзэг цэгүүдэд 571.8 сая төгрөгийн 2530 хяналтын телекамерыг байршуулсан.

“Эрүүл цагдаа”, “Цагдаа, дотоодын цэргийн байгууллагын соёлыг төлөвшүүлэх хөтөлбөр”-ийг хэрэгжүүллээ

Алба хаагч, ажилтны эрүүл мэндийг хамгаалах, өвчлөлийг бууруулах, түүнээс урьдчилан сэргийлэх зорилгоор “Эрүүл цагдаа”, алба хаагчдын ажлын хариуцлага, сахилга, байгууллагын соёлын түвшинг дээшлүүлэх зорилгоор “Цагдаа, дотоодын цэргийн байгууллагын соёлыг төлөвшүүлэх” хөтөлбөрүүдийг баталсан.