Улаанбаатар /МОНЦАМЭ/. УИХ-ын дарга Г.Занданшатар Унгар Улсаас Монгол Улсад суугаа Онц бөгөөд Бүрэн эрхт Элчин сайд Борбала Анна Обрушанскиг өнөөдөр хүлээн авч уулзлаа.

УИХ-ын дарга Г.Занданшатар Унгар Улсаас манай улсад монголч эрдэмтэн, туршлагтай дипломатч томилогдсонд баяртай байгаагаа илэрхийлж, Унгар Улсын Элчин сайдын яамнаас 33 ширхэг амьсгалын аппаратыг нийслэл болон хөдөө орон нутгийн эмнэлгүүдэд хандивласанд нийслэлийн Засаг даргын Тамгын газрын нэрийн өмнөөс болон хувиасаа талархал илэрхийлэв.

Элчин сайд Борбала Анна Обрушански УИХ-ын даргыг цаг зав гарган хүлээн авч уулзаж байгаад талархал илэрхийлээд Унгар Улсын Засгийн газрын тэтгэлгээр Монгол Улсаас жил бүр 200 оюутан суралцуулах оюутны сонгон шалгаруулалт зарласныг дуулгаж, хөдөө орон нутаг болон нийслэлийн оюутан залуусыг хамрагдахыг уриалав. Тэрбээр, орон нутгаас Унгар Улсын ижил төстэй аймагтай ах дүүгийн найрамдалт харилцаа тогтоосон, мөн шинжлэх ухааны салбар дахь хамтын ажиллагаа амжилттай хөгжиж байгааг танилцуулав. Тодруулбал, Сүхбаатар дүүргийн нутаг дэвсгэрт “Бэлхийн амны Хүннүгийн язгууртны булшны археологийн судалгаа” төсөл амжилттай хэрэгжиж, олдворын ДНК-гийн шинжилгээ Унгарт хийэж байна гэлээ. Түүнчлэн, кино урлагийн салбарт Бат хааны тухай уран сайхны кино, мөн Хүннү гүрний тухай баримтат кино хийж байгааг дуулгав.

УИХ-ын дарга Г.Занданшатар энэ тухай сонсоход таатай байна гээд боловсролын салбар нь манай хоёр улсын харилцааны тэргүүлэх чиглэл болохыг тэмдэглэж, монголын олон зуун залуучууд Унгар Улсад суралцан мэргэжлийн боловсон хүчин болон бэлтгэгдэж, эх орныхоо бүтээн байгуулалтад үнэтэй хувь нэмэр оруулж байгааг онцлов. Мөн соёлын салбар, тэр дундаа кино урлагийн чиглэлийн хамтын ажиллагаа өргөжин хөгжиж байна. Унгарын сайн туршлагыг нэвтрүүлэх, энэ чиглэлээрх хамтын ажиллагааг бэхжүүлэх сонирхолтой байна гэв. Түүнчлэн, хоёр орны улс төрийн харилцаа өндөр түвшинд бэхжиж, уламжлалт сайн харилцаатай Унгар Улсыг бид чухал түнш хэмээн үздэг. Харин хоёр талын худалдаа, эдийн засгийн хамтын ажиллагааг эрчимжүүлэх сонирхолтой байна. Сүүлийн жилүүдэд хоёр улсын худалдааны эргэлт 50 хүртэл хувиар нэмэгдсэн нь хатагтай Борбала Анна Обрушанскигийн хүчин чармайлт болохыг онцолж, талархал илэрхийлэхийн сацуу энэ бол манай хоёр улсын харилцааны чухал хэсэг болохыг тэмдэглэв.

Талууд олон улсын тавцан дахь хоёр улсын хамтын ажиллагаа, хөдөө аж ахуй, ноос, ноолуур болон спортын салбарын хамтын ажиллагааг өргөжүүлэх талаар санал солилцов. Уулзалтын төгсгөлд УИХ-ын дарга Г.Занданшатар эрхэмсэг хатагтай, монголч эрдэмтэн Борбала Анна Обрушанскиг монгол судлалыг хөгжүүлэхэд үнэтэй хувь нэмэр оруулж байгаад талархал илэрхийлээд “Монголын Нууц Товчоон” номыг дурсгалаа.