СӨХ-гүй байрны оршин суугчид орц, орчноо ариутгах боломжтой боллоо

МОНГОЛЫН МЭДЭЭ | НИЙГЭМ
oyundelger@montsame.gov.mn
2021-05-05 15:22:35

Улаанбаатар /МОНЦАМЭ/. ДЭМБ-аас цар тахлын үед ариутгал, халдваргүйтгэлийг сайтар хийх шаардлагатайг зөвлөж байгаа. Иймд НИТХ-ын дарга Ж.Батбаясгалан Баянгол дүүргийн байшин хороолол бүхий 22 хороонд 122 ширхэг автомакс буюу ариутгалын бодис шүршигч олголоо.


Ингэснээр тус дүүргийн хэмжээнд СӨХ-гүй 310 байрыг өдөр бүр ариутгах, халдваргүйжүүлэх боломжтой болж байна. Эдгээр байранд 4200 орчим өрх амьдардаг. СӨХ-гүй учраас цар тахлын энэ үед халдваргүйтгэл, ариутгалыг тогтмол хийж чаддаггүй байжээ.


Баянгол дүүргийн VI хорооны СӨХ-гүй 32 байранд 560 өрх амьдардаг. Эдгээр байранд 13 ширхэг автомакс хуваарилжээ. Тус хорооны 28 дугаар байрны оршин суугч Д.Ганболд “Манай хорооны СӨХ-гүй байрууд 10-15 жилийн өмнө ашиглалтад орсон. СӨХ-гүй учраас олон асуудал тулгардаг. Хорооноос хуваарийн дагуу ариутгал хийдэг ч хогоо хаяж, дэлгүүр орохдоо гадаах орчноосоо халдвар авах эрсдэл их байна. Харин одоо бид өөрсдөө өдөр бүр ариутгал хийх боломжтой боллоо” гэв. 

 

Related news