Улаанбаатар
СҮХБААТАР: 10 сая мод тарихад уул уурхайн компаниуд голлох үүрэг хүлээнэ
ОРОН НУТГИЙН МЭДЭЭ | СҮХБААТАР
Баруун-Урт, 2025 оны дөрөвдүгээр сарын 28 /МОНЦАМЭ/. "Тэрбум мод" үндэсний хөдөлгөөний хүрээнд Сүхбаатар аймаг 2030 он хүртэл 10 сая мод тарих үүргийг хүлээсэн. Энэ үүргийн хэрэгжилтийг хангахад уул уурхайн компаниуд чухал оролцоотой бөгөөд хамгийн олон уурхайтай гэгддэг Эрдэнэцагаан, Сүхбаатар сумд хамгийн олон мод тарина.
Баруун-Урт, Дарьгангаас бусад бүх суманд уул уурхайн чиглэлээр үйл ажиллагаа эрхлэгч ААНБ бий. Эдгээр нь бүгд тодорхой тооны мод тарих ёстой. Тодруулбал, Наран Онгон суманд 13500, Баяндэлгэр, Халзан суманд 45000, Асгат, Мөнххаан, Түвшинширээ, Түмэнцогт, Уулбаян суманд 126-459 мянган мод тарих бол Эрдэнэцагаан суманд 1 сая 206 мянга, Сүхбаатарт 1 сая 653 мянган ширхэг модыг зөвхөн уул уурхайн команиуд нь хамтран тарих юм.
"Тэрбум мод" үндэсний хөдөлгөөний хэрэгжилт Сүхбаатар аймаг удаашралтай байгаа. Ялангуяа уул уурхайн компаниуд хүлээсэн үүргээ хэрэгжүүлэх нь хайнга байна. Тиймээс уул уурхайн компани, орон нутаг хоорондын хамтын ажиллагааны гэрээнд мод тарих заалтыг нарийвчлан тусгаж, хяналтыг сайжруулахад хамтран ажиллах саналаа орон нутгийн удирдлагуудад танилцуулсан. Ээлжит зөвлөгөөнөөр үүнийг ажил хэрэг болгоход анхаарч ажиллах байх гэдэгт итгэж байна гэж аймгийн БОГ-ын дарга Ш.Нямхүү хэллээ.
Ашиглалтын талбай буюу
уурхайн бүс орчмын талбайд тарьсан модны тоогоор "Цайрт минерал" компани тэргүүлж байна.
