Улаанбаатар
Цэн тогоруу хамгаалахад хамтран ажиллана
МОНГОЛЫН МЭДЭЭ | БАЙГАЛЬ ОРЧИН
Улаанбаатар, 2023 оны арванхоёрдугаар сарын 18 /МОНЦАМЭ/. Монгол, Хятад улсын Тусгай хамгаалалттай газрууд цэн тогоруу хамгаалахад хамтран ажиллана. Хурх-Хүйтэний байгалийн нөөц газар (ХХБНГ), БНХАУ-ын Поян нуурын үндэсний байгалийн нөөц газартай стратегийн хамтын ажиллагааны санамж бичиг байгуулжээ.
Тус хоёр газар нь дэлхийд ховордсон цэн тогоруу (Эмзэг), цагаан тогоруу (Устаж болзошгүй) зэрэг олон зүйл нүүдлийн усны шувууд зусаж, үрждэг чухал ач холбогдолтой бүс нутаг юм. Дэлхийн цэн тогорууны баруун талын популяцийн ихэнх бодгал нь Поян нуурт өвөлжиж, Монгол орны зүүн хойд хэсэгт орших тал хээр, ойт хээрийн бүсийн ус намгархаг газар үүрлэн үрждэг. Эдгээрээс Хурх-Хүйтэний байгалийн нөөц газар ХХБНГ-т цэн тогорууны үүрний нягтшил хамгийн их байдаг аж.
Санамж бичгийн хүрээнд талууд хамтарсан судалгаа, мониторингийн ажлыг идэвхжүүлэх, тогорууны нүүдлийн зам дагуу олон нийтэд чиглэсэн сургалт, сурталчилгааны мэдээлэл түгээх, харилцан мэргэжилтэн солилцох, эрдэм шинжилгээний өгүүлэл хамтран хэвлүүлэх чиглэлээр хамтран ажиллана.
БОАЖЯ, Хэнтий аймгийн Засаг дарга, холбогдох дөрвөн сумдын удирдлагуудтай байгуулсан гэрээний дагуу Хурх-Хүйтэний БНГ-ын менежмент, хамгаалалтыг Зэрлэг амьтан судлах хамгаалах төв ТББ хариуцаж байгааг БОАЖЯ мэдээлэв.
Цэн
тогоруу нь “Нэн ховор зүйл”
гэсэн статустайгаар Дэлхийн байгаль хамгаалах холбооны Улаан дансны ангиллын
шалгуураар “эмзэг” зүйлд хамаардаг аж.
Поян нуурын БНГ-т өвөлждөг цагаан болон цэн тогоруу, бусад олон зүйлийн шувуудыг үзэж сонирхохоор жилд хэдэн зуун мянган жуулчин ирдэг тул мужийн захиргаанаас хоёр жилд нэг удаа усны шувуудын баяр тэмдэглэдэг байна.
