БАЯН-ӨЛГИЙ: Цагааннуурын чөлөөт бүсийн үйл ажиллагааг 2023 оны эхээр эхлүүлнэ

ОРОН НУТГИЙН МЭДЭЭ | БАЯН-ӨЛГИЙ
bayanulgii@montsame.gov.mn
2022-11-14 10:14:47

Баян-Өлгий /МОНЦАМЭ/. Баян-Өлгий аймгийн Ногооннуур сумын нутаг дэвсгэрт оршдог Цагааннуурын чөлөөт бүс ирэх оны нэгдүгээр улиралд багтаан үйл ажиллагаагаа эхлүүлнэ гэж тус чөлөөт бүсийн Хөрөнгө оруулалт, хамтын ажиллагааны хэлтсийн дарга И.Хайратбек мэдэгдлээ.


"Цагааннуурын чөлөөт бүсийг 2023 оны 1 дүгээр улиралд багтаан нээх тухай Засгийн газрын шийдвэр гарахад бэлэн болсон. Үүнтэй холбоотой бэлтгэл ажлыг хангахаар миний бие Улаанбаатар хотоос орон нутагт ирээд байна. Чөлөөт бүсийн үйл ажиллагаа эхлээд явах юм бол Баян-Өлгий аймгийн бизнес эрхлэгчид чөлөөт бүсэд үйл ажиллагаа явуулах нөхцөл бүрэн бүрдэнэ" гэдгийг тэрээр онцоллоо.


Монгол Улсын Их Хурлын 2005 оны 74 дүгээр тогтоолоор Цагааннуурын чөлөөт бүсийг байгуулж, нутаг дэвсгэрийн хэмжээг нь 708.4 га байхаар тогтоож байсан түүхтэй. Улмаар 2008 онд тухайн газарт харуулын 5 шалган нэвтрүүлэх байртай  15.6 км урт хамгаалалтын хашаа барьжээ. Мөн мастер төлөвлөгөө, бүсийн байгаль орчны нөлөөлөх байдлын нарийвчилсан үнэлгээ, бүс доторх эрчим хүчний сүлжээ татах, халаалтын зуух авч суурилуулах ажлуудыг улсын төсвийн хөрөнгөөр тус тус хийсэн байна.


“Цагааннуурын чөлөөт бүс байрлаж байгаа газар нь аймгийн төвөөс хойшоо 60 км, ОХУ-ын хилээс урагш 28 км, Улаанбаатар хотоос 1700 км, БНХАУ-ын хилээс 212 км, Казахстан Улсын хилээс /ОХУ-аар дамжин/ 190 км, Ховд аймгийн төвөөс 260 км, Увс аймгийн төвөөс 224 км зайд, Евро-Азийг холбож буй АН-32, Азийн хурдны АН-4 чиглэлийн авто замын дагуу оршдог.


Саяхан Цагааннуур-Улаанбайшинт чиглэлийн 25,8 км хатуу хучилттай зам ашиглалтад орсноор тухайн чөлөөт бүс нь Баруун бүсийн босоо тэнхлэгийн авто зам болон Азийн авто замын сүлжээний АН-4, Төв Азийн бүс нутгийн эдийн засгийн хамтын ажиллагааны хөтөлбөр CAREC-ийн 4”а” коридоруудтай холбогдоод байна.


Монгол Улсын хамгийн баруун хязгаарт Орос, Хятад, Казахстан 3 улсын хилд маш ойрхон байршилтай Цагааннуурын чөлөөт бүсийн үйл ажиллагаа эхэлснээр бараа таваарын томоохон урсгал бий болж, улс орны хөгжилд жинтэй хувь нэмэр оруулна гэдгийг мэргэжлийн хүмүүс хэлж байна. 

Холбоотой мэдээ