Химич Б.Доржпаламын нэрэмжит эрдэм шинжилгээний хурал эхэллээ

Монголын мэдээ | Боловсрол
bolor@montsame.mn
2019-11-15 10:34:30

Улаанбаатар /МОНЦАМЭ/. Эрдэм шинжилгээний ажилтны баярыг тохиолдуулан ШУА-ийн Хими, химийн технологийн хүрээлэнгээс жил бүр зохион байгуулдаг эрдэм шинжилгээний бага хурал “Хими-2019” өнөөдөр болж байна.

Өнөө жил тус эрдэм шинжилгээний бага хурлыг Монгол Улсын Төрийн соёрхолт, химич, доктор Банзарын Доржпаламын мэндэлсний 70 насны ойд зориулан, түүний нэрэмжит болгон зохион байгуулж буй юм.

Доктор Б.Доржпалам 1972 онд ЗХУ-ын М.В.Ломоносовын нэрэмжит Москвагийн их сургуулийг амжилттай дүүргэн, ШУА-ийн Химийн хүрээлэнд эрдэм шинжилгээний дадлагажигч ажилтнаар оржээ. Хүрээлэнд 26 жил тасралтгүй ажиллахдаа 16 жил Химийн хүрээлэнгийн эрдэмтэн нарийн бичгийн даргын албыг хашиж, Монгол Улсад шинжлэх ухааныг хөгжүүлэх, эрдэм шинжилгээний ажлын онолын түвшинг дээшлүүлэх, судалгааны ажлын үр дүнг үйлдвэр практикт нэвтрүүлэхэд бие, сэтгэлээ зориулсан авьяаслаг эрдэмтэн юм.  

Түүний санаачилж эхлүүлсэн олон ажил өнөө ч үргэлжлэн өргөжин хөгжиж байна. Тухайлбал, 1993 онд Химийн хүрээлэнгийн “Эрдэм шинжилгээний бүтээл”-ийг анх удаа англи хэлээр өөрөө орчуулж эрхлэн гаргасан нь англи хэлээр гаргаж буй “Mongolian Journal of Chemistry” сэтгүүлийн эхлэл байв. Уг сэтгүүл 2019 онд Elsevier хэвлэлийн компанийн Scopus мэдээллийн санд бүртгүүлсэн нь энэ салбарынхны хувьд томоохон үйл явдал болсон юм.  Мөн тус хүрээлэнгийн Биохимийн лабораторид явуулж байсан уурагт түүхий эд, бүтээгдэхүүний судалгааны ажлын цар хүрээ өргөжин, хэд хэдэн  шинэ төрлийн бүтээгдэхүүний технологийг бий болгосон байна.  


Холбоотой мэдээ