Улаанбаатар
"Авазагийн Үйл ажиллагааны хөтөлбөр”-ийг хэрэгжүүлэх талаарх зөвлөлдөх уулзалт болов
МОНГОЛЫН МЭДЭЭ | УЛС ТӨР
Улаанбаатар, 2025 оны арваннэгдүгээр сарын 5 /МОНЦАМЭ/. Гадаад харилцааны яам, НҮБ-ын Суурин зохицуулагчийн газар, Далайд гарцгүй хөгжиж буй орнуудын Олон улсын судалгааны төв хамтран “2024-2034 оны Авазагийн Үйл ажиллагааны хөтөлбөр” (АҮАХ)-ийг хэрэгжүүлэх талаарх зөвлөлдөх уулзалтыг НҮБ-ын байранд энэ сарын 4-нд зохион байгууллаа.
2024 оны 12 дугаар сард НҮБ-ын Ерөнхий Ассамблейн чуулганаар
хүлээн зөвшөөрч, 2025 оны 8 дугаар сард Туркменистан Улсын Аваза хотод болсон
Далайд гарцгүй хөгжиж буй орнуудын асуудлаарх НҮБ-ын Гуравдугаар бага хурлаар
баталсан “Авазагийн Үйл ажиллагааны хөтөлбөр” нь дэлхийн 32 далайд гарцгүй
хөгжиж буй орны хөгжлийн өвөрмөц сорилтуудыг шийдвэрлэхэд чиглэсэн 10 жилийн
хугацаатай дэлхийн хэмжээний хөтөлбөр юм.
Нью-Йорк хотноо өнгөрсөн оны 1-6 дугаар сард болсон олон
талт хэлэлцээг Монгол Улс, Австри Улстай хамтран даргалан, АҮАХ-ийг
боловсруулахад чухал үүрэг гүйцэтгэсэн юм. Зөвлөгөөнд Монгол Улсын төрийн болон
төрийн бус байгууллага, хувийн хэвшил, эрдэм шинжилгээний болон олон улсын
байгууллагуудын төлөөлөл оролцож, АҮАХ-ийн таван тэргүүлэх чиглэлийн хүрээнд
Монгол Улсад тулгарч буй сорилт, боломжуудыг хэлэлцэн, хэрэгжилтийн стратеги,
төлөвлөгөөг боловсруулах талаар санал солилцлоо.
Уг АҮАХ-ийг боловсруулахад манлайлан оролцсон Монгол Улсаас
НҮБ-д суугаа Байнгын төлөөлөгч асан, Онц бөгөөд Бүрэн эрхт Элчин В.Энхболд
үндсэн илтгэлийг танилцуулав. Түүний илтгэлд танилцуулснаар, 2022 оны байдлаар
ДГХБО-ын худалдаа нь дэлхийн барааны экспортын дөнгөж 1.1 хувь, үйлчилгээний
экспортын 0.7 хувь, дижитал үйлчилгээний 0.3 хувийг тус тус эзэлж байна.
Хэлэлцүүлэгт НҮБ-ын Ази, Номхон далайн бүсийн Эдийн засаг,
нийгмийн комисс (ESCAP), Нэн буурай хөгжилтэй орнууд, далайд гарцгүй хөгжиж буй
орнууд болон жижиг арлын хөгжиж буй орнуудын асуудал эрхэлсэн Дээд төлөөлөгчийн
газар (UN-OHRLLS) болон Монгол Улсын тээвэр, ложистик, гааль, цахим хөгжлийн
салбар болон МУИС, ХААИС-ийн судлаачид илтгэл тавьж, хэлэлцүүлэг өрнүүллээ.
Оролцогчид АҮАХ-ийн хэрэгжилтийг эрчимжүүлэхийн тулд
хөтөлбөрийн зөвлөмжийг үндэсний хөгжлийн бодлого, төлөвлөгөөнд тусгах,
хэрэгжилтийн замын зураглал боловсруулах, салбар хоорондын болон олон улсын
хамтын ажиллагааг бэхжүүлэх шаардлагатай гэдэгт санал нэгдэв. Зөвлөгөөний үеэр
АҮАХ-ийн Монгол хэл дээрх товхимолыг албан ёсоор танилцууллаа.
