Төсвийн хөрөнгө завшсан нягтлан ЗХЖШ-д ажиллаж байгаагүй

Монголын мэдээ | Хууль
munkhbaatar@montsame.gov.mn
2019-06-19 12:40:21

Улаанбаатар /МОНЦАМЭ/. Зарим хэвлэлд “ЗХЖШ-ын нягтлан 313 сая төгрөгийн хохирол учруулсан хэргийг анхан шатны шүүхэд шилжүүлжээ” гэсэн мэдээ нийтлэгдсэнтэй холбогдуулан ЗХЖШ-аас өнөөдөр хариу тайлбар гаргав. Тус тайлбарт, тухайн иргэн ЗХЖШ-д ажиллаж байгаагүй, 2014-2017 онд Зэвсэгт хүчний 065, 150 дугаар ангид ажиллаж байсан талаар дурджээ. 


Хариу тайлбарыг бүрэн эхээр нь хүргэж байна. 


ХАРИУ ТАЙЛБАР


Нэр бүхий хэвлэл мэдээллийн хэрэгслээр, 2019 оны 06 дугаар сарын 19-нд “ЗХЖШ-ын нягтлан 313 сая төгрөгийн хохирол учруулсан хэргийг анхан шатны шүүхэд шилжүүлжээ” гэх гарчиг бүхий мэдээтэй холбогдуулан ЗХЖШ дараах албан ёсны хариу тайлбарыг гаргаж байна.


Тус мэдээнд дурдсан иргэн Б нь Зэвсэгт хүчний Жанжин штабт огт ажиллаж байгаагүй бөгөөд 2014 оны 10 дугаар сарын 22-ноос 2017 оны 02 дугаар сарын 09-нд Зэвсэгт хүчний 065, 150 дугаар ангийн санхүүгийн нягтлан бодогчоор ажиллаж байсан. Тэрээр дээрх Зэвсэгт хүчний ангийн санхүүгийн нягтлангаар ажиллаж байхдаа гадаад улс руу суралцахаар явсан, өөр анги байгууллага руу шилжсэн, тэтгэвэрт гарсан зэрэг шалтгаанаар тус ангид ажиллаагүй нийт давхардсан тоогоор 500 иргэний нэр дээр хий болон илүү цалин бичиж 373,582,668.00 төгрөгийг завшиж, их хэмжээний хохирол учруулсан.


Түүний энэхүү төсвийн хөрөнгө завшсан хууль бус үйлдлийг Зэвсэгт хүчний Жанжин штабын Санхүүгийн хэлтсийн санхүүгийн дотоод аудитын албан тушаалтнууд шалгаж, илрүүлсэн. Ингээд тус хөрөнгө завшсан үйлдлийг шалгуулахаар Авлигатай тэмцэх газарт шилжүүлж, улмаар харьяаллын дагуу Баянзүрх дүүргийн эрүүгийн хэргийн анхан шатны шүүхийн 2018 оны 10 дугаар сарын 30-ны өдрийн 2018/ШЦТ/1486 дугаар тогтоолоор шийдвэрлэсэн. Түүний учруулсан хохирлын хэмжээг 310,725,167.00 төгрөгөөр тогтоосон бөгөөд Эрүүгийн хуулийн 17.4 дүгээр зүйлийн 2.2 дахь заалтад заасны дагуу 4 жилийн хугацаагаар хорих ял оногдуулж, Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.1 дэх заалтад зааснаар, гэмт хэргийн хор уршгийг арилгах талаар арга хэмжээ авах үүргийг хүлээлгэхээр шийдвэрлэсэн.


Зэвсэгт хүчний Жанжин штаб нь тус хэрэг хянан шийдвэрлэх ажиллагаанд хууль ёсны хохирогч, иргэний нэхэмжлэгчээр оролцож байгаа бөгөөд эрүүгийн хэргийн анхан шатны шүүх 4 жилийн хугацаагаар хорих ял оногдуулсан шүүхийн шийтгэх тогтоол биелүүлэхийг хоёр жилийн хугацаагаар хойшлуулж шийдвэрлэсэн нь хуулийг буруу хэрэглэж, шийдвэрлэсэн хэмээн үзэж Нийслэлийн эрүүгийн хэргийн анхан шатны шүүхэд давж заалдах гомдол гаргасан. Гэвч 2002 оны Эрүүгийн хуулийн 150 дугаар зүйлийн 150.3 дахь хэсэгт зааснаар зүйлчилж, мөн хуулийн 63 дугаар зүйлийн 63.1 дэх хэсэгт зааснаар шүүхийн шийтгэх тогтоол биелүүлэхийг хойшлуулж шийдвэрлэсэн.


Өөрөөр хэлбэл эрүүгийн хэргийн давж заалдах шатны шүүх мөн адил хуулийг буцаан хэрэглэх үндэслэлийг буруу хэрэглэж, 2002 оны Эрүүгийн хуулийн 63.1 дэх хэсэгт заасны дагуу ял хойшлуулж, шийдвэрлэсэн нь хуулийг буруу хэрэглэсэн шийдвэр гаргасан байна.


Ийнхүү Зэвсэгт хүчний Жанжин штабаас эрүүгийн хэргийн давж заалдах шатны шүүхийн магадлалыг эс зөвшөөрч Улсын дээд шүүхийн эрүүгийн хэргийн хяналтын шатны шүүхэд гомдол гаргасан. Үүний үр дүнд анхан болон давж заалдах шатны шүүхийн тогтоол, магадлалыг “Хуулийг буруу хэрэглэсэн гэх үндэслэлээр хүчингүй болгож, дахин анхан шатны шүүхээр хэлэлцүүлэхээр шилжүүлсэн. Энэ нь иргэн Б-д хорих ял оногдуулсан нь буруу байна гэсэн шийдвэр биш бөгөөд зөвхөн ял хойшлуулсан нь хуулийг буруу хэрэглэсэн хэмээн гомдол гаргасан болно. Инйхүү иргэн Б-д холбогдох эрүүгийн хэргийн анхан шатны шүүх хуралдаан 2019 оны 06 дугаар сарын 21-ний өдөр Баянзүрх дүүргийн эрүүгийн хэргийн анхан шатны шүүхэд болохоор болсон.


ЗХЖШ-аас төсвийн хөрөнгийг хууль бусаар захиран зарцуулсан, завшсан үйлдлийг дотоод аудитын хяналт, шалгалтаар илрүүлж, хууль хяналтын байгууллагад шалгуулахаар шилжүүлэх, цаашид ийм төрлийн зөрчил гаргуулахгүй байх үүднээс шат шатанд анхаарч, санхүүгийн төдийгүй эд хөрөнгө хариуцаж буй албан тушаалтнуудын үйл ажиллагаанд хяналт тавьж ажиллаж байна.


Зэвсэгт хүчний Жанжин штаб

Холбоотой мэдээ