Ulaanbaatar
Худалдааны чиглэлээр бизнес эрхлэх хүсэлтийг хамгийн их ирүүлжээ
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Худалдаа, үйлчилгээ, үйлдвэрлэл эрхлэлтийг бүртгэх “Онлайн бизнес төв”-д өнгөрсөн өдрүүдэд худалдааны чиглэлд 91, хоол үйлдвэрлэлд 22 тусгай зөвшөөрлийн хүсэлт ирүүлжээ.
Нийслэлд худалдаа, үйлдвэрлэл, үйлчилгээний чиглэлээр
бизнес эрхлэгч ААН болон
төрийн байгууллагын хоорондын хамтын ажиллагааг өргөжүүлэх, бүх төрлийн
бизнесийг дэмжих, орчныг сайжруулах, мэдээ мэдээллийг нэгдсэн нэг эх үүсвэрээр
дамжуулан хүргэх, хамтран ажиллах зорилгоор “Онлайн бизнес төв”-ийг энэ сарын 3-наас ажилуулж эхэлсэн юм. Тодруулбал,
нийслэлийн Засаг даргын Тамгын
газрын Хүнс,
худалдаа, үйлчилгээний хэлтсээс иргэн, хуулийн этгээдэд үзүүлж буй 9 ангиллын 74 нэр төрлийн зөвшөөрөл болон
зөвшөөрлийн шинжтэй эрх олгодог үйлчилгээний бүрдэл бичиг баримт, шат дамжлагыг багасган
“Онлайн бизнес төв”-ийн “Үйлчилгээ эрхлэх бүртгэлийн
систем”-ийг хэрэглээнд нэвтрүүлээд
байгаа юм. Дээрх системд энэ сарын 6-ны байдлаар буюу 4 хоногт 6000
гаруй иргэн, ААН,
байгууллага хандан, үйлчилгээтэй холбоотой мэдээлэл авчээ. Үүнээс 162 гаруй хүсэлт ирүүлж, бүртгэсэн
байна. Бүртгүүлсэн иргэн, ААН-үүдээс:
- худалдааны чиглэлээр 91,
- хоол үйлдвэрлэлд 22 ,
- ахуй үйлчилгээнд 15,
- авто үйлчилгээнд 14,
- зочлох үйлчилгээгээр 2,
- соёл урлагийн
чиглэлээр 4,
- үйлдвэрлэлийн чиглэлээр 7,
- тоглоомын чиглэлээр 6 хүсэлт ирүүлжээ.
Нийслэлийн Засаг дарга бөгөөд Улаанбаатар хотын Захирагчийн 2020-2024 оны үйл ажиллагааны хөтөлбөр, “Цахим засаглал төсөл”, авлига, хүнд суртлыг таслан зогсоох арга хэмжээ авах, авлигаас урьдчилан сэргийлэх чиглэлээр хэрэгжүүлэх төлөвлөгөөнд тус тус тусгагдсан ажлын дагуу төрийн үйлчилгээг илүү хүртээмжтэй, хурдан шуурхай хүргэхээр ажиллаж байна. Иймд үйлчилгээ эрхлэх зөвшөөрөл хүссэн иргэн, аж ахуйн нэгж байгууллагууд www.ulaanbaatar.mn сайтын баруун дээд буланд байх “Үйлчилгээ эрхлэх бүртгэл” цэсэд хандах, эсвэл www.service.ulaanbaatar.mn сайтад шууд хандан мэдээлэл авах болон бүртгүүлэх боломжтой.
